ورالدا بوكستان حالىقارالىق تۋرنير باستالدى - فوتو
وليمپيادالىق سپورت تۇرلەرىنىڭ ىشىندە دۇنيەجۇزىلىك دودالاردا قازاقستاندىقتار ۇنەمى جەڭىمپازدار قاتارىنان كورىنىپ كەلە جاتقان بوكس ونەرىن كەڭىنەن ورىستەتۋ ماقساتىندا قازاقستان بوكس فەدەراتسياسىنىڭ قولداۋىمەن ب ق و دەنە شىنىقتىرۋ جانە سپورت باسقارماسى ۇيىمداستىرىپ وتىرعان جارىسقا قازاقستان، قىرعىزستان، وزبەكستان، رەسەي جانە جاپونيا ەلدەرىنەن 130 عا تارتا سپورتشى قاتىسۋدا. 1999-2000 -جىلعى جاستار 10 سالماق دارەجەسى بويىنشا سىنعا ءتۇسىپ، جەڭىمپاز- جۇلدەگەرلەر انىقتالاتىن بولادى.
«وسىناۋ حالىقارالىق تۋرنير باتىسقازاقستاندىق جاس بىلعارى قولعاپ شەبەرلەرىن وليمپ شىڭىنا جەتەلەيتىن العاشقى باسپالداق بولسىن»، دەدى جارىستىڭ اشىلۋ راسىمىندە ب ق و دەنە شىنىقتىرۋ جانە سپورت باسقارماسىنىڭ باسشىسى، بوكستان ايبا تورەشىسى ءاسيا امانبايەۆا. جارىستىڭ قۇرمەتتى قوناقتارى قاتارىندا ق ر ەڭبەك سىڭىرگەن جاتتىقتىرۋشىسى تۇرسىنعالي ەدىلوۆ، ايبا تورەشىسى سەرىك ابدەناليەۆ، الەم چەمپيونى، وليمپيادا ويىندارىنىڭ ەكى مارتە كۇمىس جۇلدەگەرى بولات ءجۇمادىلوۆ، وليمپيادا ويىندارىنىڭ قولا جۇلدەگەرى سەرىك ەلەۋوۆ، الەم چەمپيونى ەردوس جاڭابەرگەنوۆ، الەم چەمپيونى گاليب جافاروۆ پەن ونىڭ باپكەرى الىمبەك بالماعامبەتوۆ بار.
«بۇل دوداعا وزبەكستان جاستار قۇراماسىنىڭ نەگىزگى مۇشەلەرىمەن قاتار ەكىنشى، ءۇشىنشى ءنومىرلى بوكسشىلاردى دا الىپ كەلدىك. ولاردىڭ قانشالىقتى دايىندىقپەن كەلگەندىگىن جەكپە- جەكتەر كورسەتەتىن بولادى. تۋرنيرگە گاليب جافاروۆتىڭ شاقىرتۋىمەن كەلدىك»، دەدى وزبەكستان جاستار قۇراماسىنىڭ مەملەكەتتىك جاتتىقتىرۋشىسى تولاشباي دانياروۆ.
ايتا كەتەيىك، بقو- نىڭ نامىسىن كوپتەگەن جارىستا ابىرويمەن قورعاپ جۇرگەن نۇرسۇلتان نۇريدەنوۆ 49 ك گ سالماقتا ءبىرىنشى كەزدەسۋىندە الماتى وبلىسىنىڭ وكىلى جاقسىلىق احمەتتى ءبىراۋىزدان جەڭدى.
اۆتور: ەلجان ەرالى
