تاجىك- اۋعان شەكاراسىندا اسكەري بورىشىن وتەگەن جالعىز قازاقستاندىق ايەل پاۆلوداردا تۇرادى
اسكەري ادامعا تۇرمىسقا شىققان ورىمدەي جاس قىز «نە كورسەم دە، جولداسىممەن بىرگە كورەمىن» دەگەن سەرتتەن تايماپتى. ايمان رىسكەلدينانى اسكەري ءومىر جاس كەزىنەن قىزىقتىرىپتى. قۇربىلارىنا بولاشاقتا وتان قورعاۋشى بولامىن دەگەن ءازىلىنىڭ شىندىققا ۇلاسقانىن وفيتسەرگە تۇرمىسقا شىققاندا تۇسىنەدى.
تاجىك- اۋعان شەكاراسىن كۇزەتۋگە توقسانىنشى جىلدارى اتتانعان. جولداسى دۋلات سمايىلوۆ زاستاۆا باسشىسى، ءوزى راديست قىزمەتىن اتقارادى. تەڭىز دەڭگەيىنەن 4400 مەتر بيىكتىكتە ورنالاسقان پامير تاۋلارىندا ءومىر ءسۇرۋ وڭايعا تۇسپەپتى. جەتى جىلىن تۋعان جەردەن جىراقتا وتكىزگەن ايمان رامازان قىزى ەشقاشان وكىنگەن ەمەس. وركەنيەتتەن تىس قالعان حالىقتىڭ اۋىر تىرلىگى اتامەكەننىڭ قادىرىن ارتتىرىپ، اسكەري ءومىر ونى شيراتا تۇسكەن.
«اسكەري سالادا قىز-كەلىنشەكتەر وتە كوپ. ولار وسى ەر ازاماتتارمەن بىرگە قيىندىقتاردى كورىپ جاتىر. سوعان قاراماستان، ولار ۇيلەرىندە ايەل، انا، جۇمىستا اسكەري قىزمەتتەرىن اتقارادى. سوندىقتان وسى 8 -ناۋرىزدا ايەلدەرگە زور دەنساۋلىق، اشىق اسپان تىلەيمىن»، - دەيدى قورعانىس ىستەرى دەپارتامەنتىنىڭ قىزمەتكەرى ايمان رىسكەلدينا.
تاجىك- اۋعان شەكاراسىندا بولعان قاقتىعىستىڭ اياقتالعانىنا تالاي جىلدىڭ ءجۇزى بولدى. ورتا ازيا ايماقتارىنداعى شەكارا قاۋىپسىزدىگىن قامتاماسىز ەتۋگە ءبىزدىڭ ەلىمىزدىڭ دە اسكەريلەرى ۇلەس قوستى. قازىر تاجىكستاندا بەيبىتشىلىك سالتانات قۇرعان. وتان قورعاۋشىلار قاتارىندا ەرلەرمەن بىردەي ەرلىك جاساۋعا دايىن ايمانداي قازاق قىزىنىڭ بولعانىن ءبىز ءارقاشان ماقتان تۇتامىز.
