تاكسيشى ايەل: بانكتە ىستەپ ءجۇرىپ قىسقارتىلدىم. وسى جۇمىسىم وزىمە ۇنايدى

استانا. قازاقپارات - كولىك تىزگىندەگەن ايەلدى كورگەن ادام: «تاكسي جۇرگىزۋشىسى بولۋ - ايەل زاتىنىڭ تابيعاتىنا جات ءىس»، - دەپ قابىلداۋى مۇمكىن.

الايدا، بۇل كاسىپتى ەكىنىڭ ءبىرى ەرىككەننەن الىپ جۇرمەگەنى انىق. باكۋدە كوبىسى كۇنكورىس قامى ءۇشىن، - دەپ جازدى 24.kz.

مىسالى، حاليدا بابايەۆا. بۇرىن بانكتە قىزمەت ەتكەن. قىسقارتۋعا ىلىككەن سوڭ لايىقتى جۇمىس ورنىن تابا الماعان. بالانىڭ وقۋىن تولەپ، موينىنداعى نەسيەسىن جابۋ ءۇشىن رولگە وتىرۋعا ءماجبۇر.

«تەحنيكا جاعىن ءبىلۋ سونشا ماڭىزدى ەمەس، شاقىرعاندا كومەككە كەلەتىن دوستارىڭ بولسا جەتكىلىكتى، - دەيدى ول.

« كولىكتى قالاي جوندەپ، سىنسا، نە ىستەۋ كەرەك ەكەنىن بىلمەيمىن. قاجەت بولعاندا تەحنيكالىق قىزمەت كورسەتەتىن ارنايى ورىندارعا بارامىن. ءبىر رەت دوڭگەلەگىم جارىلىپ، جولدا قالعانىم بار. دوستارىما قوڭىراۋ شالىپ، جاعدايدى ايتتىم. ولار كەلىپ اۋىستىرىپ بەردى. ايەل ادامى بولعاندىقتان، ارينە، ول مەن ءۇشىن قيىن شارۋا. كولىك جوندەۋ قىزداردىڭ قولىنان كەلە بەرمەيتىنىن مويىندايمىن»، - دەيدى تاكسي جۇرگىزۋشىسى حاليدا بابايەۆا.

وشاق ۇيىتقىسى بولعان تاكسي جۇرگىزۋشى- ايەل بالا تاربيلەپ، قىزمەتىن اتقارىپ جۇرسە دە قاۋىپسىزدىك ماسەلەسىن ەستەن شىعارمايدى. سەبەبى بۇل ءقاۋىپتى كاسىپتەردىڭ ءبىرى.

«كەشكى 21:00-دەن كەيىن جۇمىسقا شىقپاۋعا تىرىسامىن. اسىرەسە جۇما، سەنبى كۇندەرى. سەبەبى بۇل كۇندەرى كوپ ادام تۇنگى كلۋبتارعا بارىپ ىشىمدىك ىشەدى. ال، ىشكەن ادام ءقاۋىپتى. مەيلى، ايەل بولسىن، ەر ادام بولسىن. ماعان شەتەل ازاماتتارىمەن جۇمىس ىستەگەن ۇنايدى. وسى جۇمىستىڭ ارقاسىندا قازاقستاننان كەلگەن ءبىر ايەلمەن تانىستىم. ءقازىر Facebook جەلىسىندە ارالاسىپ تۇرامىز»، - دەيدى تاكسي جۇرگىزۋشىسى حاليدا بابايەۆا.

كوپ جاعدايدا ەرلەر جاعى كولىك تىزگىندەگەن قىز- كەلىنشەكتەرگە اسا قۇرمەتپەن قاراپ جاتادى. ءتىپتى تاكسيدە كەلىپ تۇرعان كەزەگىن ۇسىنىپ، جول بەرەدى.

فاتيما گاسانزادەنىڭ لوندوندىق كەبقا وتىرعانىنا بەس جىل بولىپتى. بارىنەن بۇرىن كاسىبىم وزىمە ۇنايدى. «رولدە وتىرعان ەرلەرگە ۇيرەنگەن جولاۋشىلار دا قىزىق كورەدى»، - دەيدى ول.

«جۇمىسىم قاۋىپسىز. جۇمىس كەستەسى دە ءتيىمدى. كليەنتتەر قۋانا وتىرادى. بىردە- ءبىر جان مەنى رەنجىتىپ كورگەن ەمەس. كولىكتەن ءتۇسىپ بارا جاتىپ، قوشتاساردا ىزگى تىلەكتەرىن ايتىپ كەتەدى. بۇرىن كولىگىم اقشىل كوك بولاتىن، قازىر القىزىل ءتۇستى. كولىكتىڭ ءنومىرى دە جاقسى»، - دەيدى تاكسي جۇرگىزۋشىسى فاتيما گاسانزادە.

ستاتيستيكا بويىنشا، باكۋدە تاكسي كولىكتەرىن جۇرگىزەتىن 10 ايەل بار. ولاردىڭ دەنى قىسقارتۋعا ۇشىراپ، كاسىبىن وزگەرتۋگە ءماجبۇر بولعاندار. ەرلەر اتقاراتىن اۋىر جۇمىسپەن اينالىسۋعا تۋرا كەلسە دە، ولار قيىندىققا مويىمايدى. كەرىسىنشە، تاڭداپ العان كاسىبىنە جان- تانىمەن بەرىلىپ، پايداسىن كورىپ جاتادى.