وليمپياداعا قاتىسىپ، ەل نامىسىن قورعاۋ - باستى ارمانىم - انيتا ناگاي

ورال. قازاقپارات - الداعى جىلى وڭتۇستىك كورەيانىڭ پحەنچحان قالاسىندا وتەتىن قىسقى وليمپيادا ويىندارىنا قاتىسىپ، ەل نامىسىن ابىرويمەن قورعاۋ - باستى ارمانىم.

بۇل تۋرالى شورت- ترەكتەن قازاقستان ۇلتتىق قۇراماسىنىڭ مۇشەسى انيتا ناگاي ءمالىم ەتتى، دەپ حابارلايدى «قازاقپارات» ح ا ا ءتىلشىسى. نەبارى ون سەگىز جاستاعى انيتا ناگاي سپورتتىق جولىندا قازىردىڭ وزىندە ۇلكەن تابىستارعا قول جەتكىزىپ كەلەدى. وتكەن جىلى نورۆەگيانىڭ ليللەحاممەر قالاسىندا جاسوسپىرىمدەر اراسىندا ارالاس كوماندالىق جارىستا قولا مەدالدى يەلەنىپ، مامانداردىڭ نازارىن اۋدارعان انيتا بيىل دا ءساتتى ونەر كورسەتە ءبىلدى.

الدىمەن الماتىدا دۇنيەجۇزىلىك XVIII قىسقى ۋنيۆەرسيادادا، سودان كەيىن ساپپورو قالاسىندا Ⅷ قىسقى ازيا ويىندارىندا قازاقستان قۇراماسى ساپىندا ەستافەتالىق جارىستا قولا جۇلدەنى يەلەندى. انيتانىڭ اكەسى ارتۋر ۆيكتوروۆيچ «جايىقجىلۋقۋات» ا ق- عا قاراستى ورال جىلۋ- قۋات ورتالىعىندا كارتەل سەحىنىڭ ماشينيسى بولسا، اناسى ايناگۇل تەمىرجان قىزى دا وسى كاسىپورىندا جۇمىس جاسايدى.

انيتانى كىشكەنتاي كەزىنەن سپورتپەن دوستاستىرعان بۇرىن جابىق مۇز ايدىنى سپورت سارايىندا ەڭبەك ەتكەن اكەسى ەدى. توعىز جاسىنان شورت- ترەككە ءبىرجولا بەت بۇرعان انيتا ناگاي سودان بەرى تىنباي جاتتىعىپ كەلەدى. مەملەكەتتىك تىلدە تازا سويلەيتىن انيتا باتىس قازاقستان يننوۆاتسيالىق- تەحنولوگيالىق ۋنيۆەرسيتەتىندە دەنە شىنىقتىرۋ جانە سپورت ماماندىعى بويىنشا 1 كۋرستا ءبىلىم الۋدا.

وسىدان ەكى كۇن بۇرىن قىسقى ازيا ويىندارىنان ورالعان انيتا ناگايدى ب ق و دەنە شىنىقتىرۋ جانە سپورت باسقارماسىنىڭ باسشىسى ءاسيا امانبايەۆا باستاعان سپورت سۇيەر قاۋىم، ءوزى جاتتىعاتىن جابىق مۇز ايدىنى سپورت سارايىنىڭ ۇجىمى، باپكەرى ماكسيم لوزوۆوي، ۋنيۆەرسيتەتتە بىرگە وقيتىن ستۋدەنتتەر تەمىر جول ۆوكزالىنان ەرەكشە قوشەمەت كورسەتىپ، كۇتىپ العان-دى.

«باپكەرلەرىمە، اتا-اناما، قۋانىشىمدى بولىسكەندەردىڭ بارىنە ريزامىن. بۇل ماعان ودان دا ۇلكەن جاۋاپكەرشىلىك جۇكتەيدى. الداعى جارىستاردا شەبەرلىككە قوسا ساتتىلىك جولداس بولىپ، كەلەسى جىلعى وليمپيادا ويىندارىنا جولداما السام با دەيمىن. ءبىز وتباسىندا بەس قىزبىز. سوندىقتان ءبىزدى وسى كۇنگە جەتكىزگەن انامدى، سونداي- اق باۋىرلارىمدى، بارشا ارۋلاردى حالىقارالىق ايەلدەر كۇنىمەن قۇتتىقتاپ، ەڭ ىزگى تىلەكتەرىمدى بىلدىرگىم كەلەدى. بەس قىزى مەن سۇيىكتى جارىن قۇرمەتتەپ، توبەسىنە كوتەرىپ كەلە جاتقان اسقار تاۋداي اكەمنىڭ دە، ارينە، ورنى بولەك قوي. وسىنداي جاناشىر جاندار باردا قازاق ەلىنىڭ كوك بايراعى بيىكتە جەلبىرەۋى ءۇشىن بار كۇش- جىگەرىمدى جۇمساي بەرەتىنىم انىق. ازداعان دەمالىستان كەيىن استاناعا بارىپ، جاتتىعۋعا قايتا كىرىسەمىن»، دەدى «قازاقپارات» تىلشىسىنە انيتا ناگاي.



ەسكە سالا كەتەيىك، ەكى كۇننەن كەيىن گوللانديانىڭ روتتەردام قالاسىندا شورت-ترەكتەن باستالاتىن الەم چەمپيوناتىندا قازاقستان قۇراماسى ساپىندا ابزال اجىعاليەۆ، نۇربەرگەن جۇماعازيەۆ، ايدار بەكجانوۆ، دەنيس نيكيشا جانە اناستاسيا كرەستوۆا جارىس جولىنا شىعادى. «قىزعالداقتار ەلىنەن» دە جاقسى جاڭالىقتار كۇتەمىز.

اۆتور: ەلجان ەرالى