ارگەنتينالىق ۇستازدار جاپپاي ەرەۋىلگە شىقتى

استانا. قازاقپارات - ارگەنتينالىق مۇعالىمدەر جاپپاي ەرەۋىلگە شىقتى.

ەل استاناسى بۋەنوس- ايرەس كوشەلەرىنە شىققان مىڭداعان ۇستاز مەملەكەتتىڭ پارلامەنت ۇيىنەن ءبىلىم مينيسترلىگىنە دەيىن ۇرانداتىپ كەلگەن، دەپ جازادى «حابار 24».

ولار ۇكىمەتتەن ەڭبەكاقىنىڭ 35 پايىزعا كوتەرىلۋىن تالاپ ەتىپ وتىر. بيلىكتەگىلەر كاسىپوداق ۇيىمدارىنا جالاقىنى 18 پايىزعا كوتەرەتىنىن ايتقان. ءبىراق نارازىلىق شەرۋگە شىققاندار مۇنى قاناعات تۇتپادى.

ايتۋلارىنشا، قوسىلعان قارجى سوڭعى ۋاقىتتا ورىن العان ينفلياتسيا شىعىنىنىڭ ورنىن تولتىرا المايدى. وتكەن جىلدىڭ قورىتىندىسى بويىنشا مۇندا ينفلياتسيا قۇنى 40 پايىزدى قۇراعان. جەرگىلىكتى باسىلىمداردىڭ ايتۋىنشا، مۇعالىمدەردىڭ 48 ساعاتتىق ەرەۋىلگە شىعىپ كەتۋىنەن 12 ميلليون بالا مەكتەپكە بارماي، بارلىق قالالاردا ساباق توقتاعان. «وسىنشا ادامنىڭ جۇمىسىن تاستاپ، كوشەگە شىققانىنا قىنجىلامىن. مۇنداي جاعداي ءبىرىنشى رەت بولىپ تۇرعان جوق. ەرەۋىلدەر بۇعان دەيىن دە ءوتتى. ءبىراق ناتيجەسىز. كەرىسىنشە جاعداي ودان ارى ۋشىعادى. ءبىر ۇستەل باسىنا وتىرىپ، ورتاق شەشىمگە كەلۋگە بولادى عوي»، - دەيدى دەيدى ارگەنتينا پرەزيدەنتى ماۋريسيو ماكري.