نازاربايەۆ ايەلدەر قاۋىمىنا ونەگەلى اڭگىمە ايتىپ بەردى

استانا. قازاقپارات - بۇگىن اقوردادا قازاقستاننىڭ ايەلدەر قاۋىمى وكىلدەرىمەن «كوكتەم شۋاعى» اتتى كەزدەسۋ بارىسىندا ەلباسى نۇرسۇلتان نازاربايەۆ قازاقستاندىق بارلىق وتباسىعا ۇلگى- ونەگە بولارلىق اڭگىمە ايتىپ بەردى، دەپ حابارلايدى قازاقپارات.

«ەر- ازاماتتار اشۋلانسا سابىرعا، ارازداسسا تاتۋلاستىققا شاقىرىپ، ەلدى بەرەكەلى ەتۋ سىزدەرگە بايلانىستى. ءبىر اڭگىمە ەستىپ ەدىم. شاعىن قالادا كورشى ەكى وتباسى تۇرىپتى. ءبىر قابىرعانىڭ ار جاعىندا بىرەۋى، بەر جاعىندا ەكىنشىسى. ءبىر ۇيدە تىپ- تىنىش، ۇنەمى كۇلكى، ادەمى اڭگىمە بولسا، ءبىر ۇيدە كۇندە ۇرىس، توبەلەس بولىپ جاتادى ەكەن. بىردە جاڭاعى ۇرىس بولا بەرەتىن ءۇيدىڭ ايەلى كۇيەۋىن كورشىلەردى بايقاپ كەلۋگە جۇمساپتى. ول جاسىرىن بارىپ، سىعالاپ قاراپ وتىرادى. سويتسە كورشىنىڭ ايەلى ەدەن جۋىپ جاتىر ەكەن. ۇستەلدىڭ ءۇستىن جۋىپ جاتىپ قىمبات ۆازانى شەتكە قاراي قويادى. وسى كەزدە كۇيەۋى كەلىپ، كيىمىن شەشىپ، ۇستەلدىڭ جانىنا بارعان كەزدە قىمبات ۆازانى قۇلاتىپ سىندىرادى. سىعالاپ وتىرعان كورشىسى قازىر توبەلەس- ۇرىس باستالادى دەپ ويلايدى.

الايدا كۇيەۋى ايەلىنە كەلىپ كەشىرىم سۇراسا، ايەلى: «ەگەردە ۆازانى ۇستەل شەتىنە قويماسام ول سىنباس ەدى» دەپ ول دا كۇيەۋىنەن كەشىرىم سۇرايدى. وسىنى كورىپ ۇيگە كەلگەن ودان ايەلى نە بولدى دەپ سۇرايدى. «ولار ءبىر- بىرىنەن كەشىرىم سۇراپ، قاتەلىگىن ايتادى ەكەن. ءبىز كەشىرىم سۇراماق تۇگىلى ءبىر- ءبىرىمىزدى كەمشىلىگىمىزدى مويىندامايمىز» دەگەن ەكەن. سوندىقتان كەشىرىمدى بولۋى ەكى جاقتان دا قاجەت نارسە. وتباسىنىڭ اماندىعى، تىنىشتىعى ەل ءۇشىن دە كەرەك»، - دەدى نۇرسۇلتان نازاربايەۆ.

ايتا كەتەيىك، كەزدەسۋگە ءماجىلىس دەپۋتاتى زاعيپا باليەۆا، عالىم- ميكروبيولوگ ءاليا ەرنازاروۆا، ۋنيۆەرسيادا-2017 چەمپيونى اننا شيەۆچەنكو، ق ح ا مۇشەسى، اۋىل مەكتەبىنىڭ ديرەكتورى يرينا سەدوۆا، «جاس اتامەكەن» جاس كاسىپكەرلەر كلۋبىنىڭ پرەزيدەنتى زارينا كوكجانوۆا، اقىن تولقىن قابىلشا، ءانشى ماريا گاليتسكايا، «تەڭىزشيەۆرويل» ج ش س ادام رەسۋرستارىن باسقارۋ باس مەنەدجەرى، اۋداندىق اۋرۋحانانىڭ باس دارىگەرى قارلىعاش رازيەۆا، ۇلتتىق ەكونوميكا ۆيتسە- ءمينيسترى ءمادينا ءابىلقاسىموۆا،

«استانا- بالەت» تەاترىنىڭ جەتەكشى بالەريناسى ميلانا بۋكانوۆا، كوپبالالى انا وكسانا مۋكاشيەۆا، قوبىزدان حالىقارالىق بايقاۋلاردىڭ لاۋرەاتى اقەركە تاجىبايەۆا، استانا قالالىق كامەلەتكە جاسى تولماعاندار ءىسى جونىندەگى مامانداندىرىلعان اۋدانارالىق سوتتىڭ ءتوراعاسى نازيليا راززاك، اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ءسوليسى وكسانا داۆىدەنكو، ق ر ق ك پاراشيۋت دايىندىعى ورتالىعىنىڭ اعا مامانى ريمما رامازانوۆا، اكتريسا سالتانات باقايەۆا، جۋرناليست ۆەنەرا ميرلان قىزى قاتىسۋدا.

اۆتور: مارلان جيەمباي