ايەلدەرگە سىيلىق تاڭداۋدى بىلەمىز بە؟
بىرەۋلەر ونى الدىن الا الىپ قويسا، ەندى بىرەۋلەر ءبىر كۇن قالعاندا ىزدەۋگە كىرىسەدى. سودان دۇكەندەردى ارالاپ، سورەلەردىڭ الدىندا باسىن قاسىپ تۇرعان ەر ازاماتتاردى ءجيى كورەتىنىمىز راس.
قازاقپارات ءتىلشىسى پسيحولوگ ايەلدەردىڭ بەرگەن كەڭەستەرى نەگىزىندە سىيلىق تاڭداۋ ماشاقاتىن بارىنشا جەڭىلدەتۋگە تىرىستى.
الدىمەن «سىيلىق ماڭىزدى ەمەس، كوڭىل ماڭىزدى» دەگەن قاعيدانى ەستەن شىعارماۋىمىز قاجەت.
سوندىقتان كەز كەلگەن سىيلىقتى بەرگەن كەزدە ونى الىپ جاتقان ادامعا ارناپ جىلى ءسوز ايتۋدى ۇمىتپاعان ءجون. ۇجىمدا ءاربىر قىز-كەلىنشەككە ارناپ ءبىر شۋماق ولەڭ دە شىعارۋعا بولادى.
سۇيىكتى ادامعا جۇرەكتى تەبىرەنتەتىن شىنايى ولەڭ ارناساڭىز، ال تۋعان اناڭىزعا ءوز اتىڭىزدان ءبىر جىر جولدارىن شىعارساڭىز دا ارتىق ەتپەيدى. ال سىيلىققا كەلەر بولساق، بۇل جەردە «پسيحولوگيالىق» ءبىر ميف بار.
ەر ازاماتتاردىڭ كوبىسى: «ايەل ادام سەزىمتال، سوندىقتان وعان ەرەكشە ءبىر سىيلىق بەرگەن ءجون»، - دەپ ويلايدى. جەكە دارا سىي بولماسا، ايەل رەنجىپ قالادى دەگەن تاپتاۋرىن پىكىر بار.
دەگەنمەن، قازىرگى «ەرەكشە»، ءيا بولماسا، «جەكە دارا» سىيلىقتاردى تاپتىشتەيتىن بولساق، بۇنىڭ بارلىعى «پسيحولويالىق ميف» ەكەنىن تۇسىنۋگە بولادى. ءيىس سۋ، باعالى اشەكەيلەر، قىمبات تون، گاۋھار تاسى بار ساقينا، كولىك، شەتەلگە ساياحات، گۇل، شامپان، كامپيت - وسىنىڭ ءبارىن بۇعان دەيىن سىيلاعان، سىيلاپ جاتىر، سىيلادى دا.
«بىرەۋلەر ەر ازاماتتاردىڭ قيالى شەكتەۋلى دەپ ويلاپ قالۋى ابدەن مۇمكىن. استە ولاي ەمەس. ايەلدەرگە جەكە دارا سىيلىقتار ەمەس، قوعام ىشىندە بارلىعى مويىنداعان باعالى سىيلىقتار ۇنايدى. سوسىن كەيبىر ايەلدەر «توسىن سىيدى جاقسى كورەمىن!» دەپ ايتادى.
الايدا ول ءسوز دە شىندىققا جاناسپايدى. سەبەبى ايەل ادامداردىڭ پسيحولوگياسى سول، ولار الدا نە بولاتىنىن ءبىلۋى كەرەك. ول توسىن وزگەرىستەردى ۇناتپايدى. وندايدا ساناسىندا قورقىنىش پايدا بولادى. سوندىقتان ونىڭ تالعامىن ءدال تاۋىپ، سىيلىقتىڭ تۇرىمەن، ءسال دە بولسا قىمبات باعامەن تاڭقالدىرۋعا بولادى»، - دەيدى پسيحولوگ ماماندار.
الايدا اقشانى شاشىپ، تىم قىمبات سىيلىقتى دا الىپ بەرگەن دۇرىس ەمەس. ايەل ادامدار اقشانى وڭدى-سولدى شاشقان ەركەكتى كوپ ۇناتا بەرمەيدى. كەز كەلگەن ايەل تۇراقتىلىقتى قالايدى. ال اقشانى شاشا بەرەتىن ەركەك - تۇراقسىزدىقتىڭ بەلگىسى. ال وتباسىدا قىمبات سىيلىق كۇتپەگەن ايەلدىڭ ويىندا «وسى جولى نەگە قىمبات سىيلىق الىپ بەردى ەكەن؟ جاسىرىپ جۇرگەن بىردەڭەسى بار ما؟ سونى جۋىپ-شايىپ جاتقان جوق پا» دەگەن ويلار پايدا بولۋى ابدەن مۇمكىن.
سول سەبەپتى كەز كەلگەن ورتاشا سىيلىقتىڭ باعاسىن ادەمى ءارى پافوستى سوزبەن كوتەرۋگە بولاتىنىن ۇمىتپاعان ءجون. ءسوز سوڭىندا ايەل ادامعا ءبىر-اق نارسەنىڭ كەرەك ەكەنىن ءتۇسىنىپ الۋىمىز قاجەت. ول ءوزىنىڭ ادەمى، سۇلۋ، سىمباتتى، كورىكتى ەكەنىن سەزىنۋى ءتيىس. سوندىقتان كومپليمەنتتى اياماۋ قاجەت. البەتتە، ءاربىر سوزدە شىنايىلىق بولۋى ءتيىس. سەبەبى ايەل ادام - وتە سەزىمتال جان.
اۆتور: ارمان اسقاروۆ
