ديماش دومبىرا تارتۋدى نوتامەن ەمەس، ەستىپ ۇيرەندى - جايلاۋ اسىلحانوۆ
دەپ حابارلايدى قازاقپارات ءتىلشىسى.
اقتوبەدەگى احمەت جۇبانوۆ اتىنداعى مۋزىكالىق كوللەدجدىڭ وقىتۋشىسى جايلاۋ اسىلحانوۆتى كوپشىلىك كۇيشى، زەرتتەۋشى دەپ بىلەدى. ۇستاز قازانعاپتىڭ كۇيلەرىن زەرتتەپ، «بۇراڭ بەل بالجان، ءوتتى- اۋ، كەتتى- اۋ» كۇيىن العاش رەت ساحناعا الىپ شىققان بولاتىن. 90-جىلداردىڭ اياعىندا ەلىمىزدە العاش بوپ «ديماش ءالي» ستۋدياسىندا اۋديوجازباسىن شىعارىپ، حالىق اراسىنا كاسسەتالار كەڭ تارادى. ءدال سول كۇيلەر جيناعى ارادا ون جىلدان استام ۋاقىت ءوتىپ، ديسككە قايتا باسىلىپ شىقتى. بۇل كۇيشى جايلاۋ اسىلحانوۆ پەن قانات ايتبايەۆ ەڭبەگىنىڭ ورتاق جەمىسى بولدى.
«1998 -جىلى قانات ايتبايەۆ كەلىپ، «ديماش ءالي» ستۋدياسى اشىلىپ جاتىر، قازانعاپتىڭ كۇيىنەن ءۇنتاسپا شىعارساق» دەگەن ۇسىنىسىن ايتتى. قۋاندىم. ءبىر اي بويى قانات ايتبايەۆتىڭ ۇيىندەگى ستۋدياعا كۇي جازدىرىپ، «كۇيدىڭ ءپىرى - قازانعاپ» دەگەن تاسپا شىقتى. حالىققا تارادى، بارىنە ۇنادى. سونىڭ ءبارى مەنىڭ جۇرەگىمە جىلىلىق سىيلادى. ەكى اراداعى بايلانىس وسىلاي باستالدى. ول كەزدە ديماش كىشكەنتاي بالا. مەنىڭشە، كىشكەنتايىنان كۇيدىڭ كۇمبىرى قۇلاعىنا سىڭگەن بولۋى كەرەك. سونىمەن قاتار، اكەسى قانات، اتاسى قۇبايبەرگەن دە دومبىرا تارتادى»، - دەدى ج. اسىلحانوۆ.
ەكى ونەر ادامىنىڭ بايلانىسى جىل وتكەن سايىن نىعايىپ، ديماش 8 - سىنىپتان باستاپ جايلاۋ اسىلحانوۆتىڭ ۇيىرمەسىنە قاتىستى، جەكە ساباق الدى. ول «اداي» كۇيىن ءداستۇرلى كۇي ونەرىمەن ۇيرەندى.
«مەن كۇي تارتامىن، ول تىڭداپ وتىرىپ، كەيىن قايتالايدى. ا. جۇبانوۆ اتىنداعى مۋزىكالىق كوللەدجگە تۇسكەندە دە كەلدى، ساباق الدى. وتكەن جىلى قىركۇيەكتە كەلدى. ول كەزدە ساباق ءوتىپ جاتتى. سول كەزدە ديماش: «اعايدىڭ ءقادىرىن بىلىڭدەر، بىزدەر ۇيرەندىك، ءبىراق ءالى دە كوپ ساباق الاۋىمىز كەرەك ەكەن. سەندەر استاناعا بارعاندا دا وسى كىسىدەن ارتىق ەشكىمدى تاپپايسىڭدار. ساباقتان قالماڭدار» ، - دەپ ايتىپ كەتتى. سول كەزدەن باستاپ ستۋدەنتتەر جيناقتالىپ، ىنتالارى ارتا ءتۇستى. جاقسى ءسوز باسقا بالالاردىڭ وسۋىنە ىقپال ەتتى» ، - دەدى ج. اسىلحانوۆ.
«Singer-2017» بايقاۋىنداعى ديماشتىڭ جەتىستىگى دومبىراعا دەگەن قۇرمەتتى ارتتىرا ءتۇستى. ديماشتىڭ اناسى سۆەتا ايتبايەۆانىڭ ستۋدەنتتەرمەن كەزدەسۋىندە «دومبىرا تارتۋدى جايلاۋ اسىلحانوۆتان ۇيرەندى» دەگەن ءبىر اۋىز ءسوزى جاستارعا وي سالا باستادى.
«ادەتتە امان- ساۋلىق سۇرامايتىن بالالار دا كىدىرىپ، امانداساتىن بولدى. دومبىرادا وقىمايتىن بالالار دومبىرا تارتۋدى ۇيرەنگىسى كەلەتىنىن ايتتى. ال وقىپ جۇرگەن بالالار دايىندىقتى كۇشەيتىپ، ىنتاسىن ارتتىردى. بۇل جاقسى ۇگىت، ناسيحات بولدى. جاستارعا ءوز قاتارى جاقسى اسەر ەتەدى. 3-4 ادام حابارلاستى، دومبىرا تارتۋدى ۇيرەنگىسى كەلەتىنىن ايتتى. قۋاندىم، مەنىڭ بالام قىتايعا بارىپ، حالىق الدىندا كۇي تارتىپ، انمەن بىرگە دومبىرانى قالدىرماعانى ءۇشىن. ديماش ارقىلى حالىقتىڭ دومبىراعا، كۇيگە دەگەن ماحابباتى وياتىپ جاتسا، تەك قۋانۋ كەرەك. ول اتا- باباسىنىڭ قانىمەن كەلگەن ونەر. ءان ايتادى، دومبىرا تارتادى. ناعىز تالانت»، - دەدى ۇستازى.
كۇيشىنىڭ ايتۋىنشا، «كۇيدىڭ ءپىرى - قازانعاپ» تاسپاسىنىڭ شىعارىلۋى دا تەگىن ەمەس. 90-جىلدارداعى قيىن كەزدە ۇلتتىق ونەردى دارىپتەپ، سول كەزدەرى ءۇي ىشىندە ورنالاسقان ستۋدياداعى جۇمىستىڭ قازانعاپ كۇيلەرىن جيناقتاۋدان باستاعالعىندا دا ءبىر ۇندەستىك بار.
«قازاقپىز، اتالارىمىزدىڭ ارۋاعى ريزا بولعان بولار دەپ ويلايمىن مەن. سوعان مەن قۋانامىن. قىتاي ساحناسىندا «اداي» كۇيىن تارتتى، كوپتى تاڭ قالدىردى. دومبىرانى الىپ ءجۇرىپ ءوزىنىڭ قازاق ەكەنىن كورسەتتى، ۇلتىمىزدىڭ رۋحىن كوتەردى. بارلىق ءانشى وسىنداي بولسا عوي... ءبارى دومبىرا تارتا السا ەكەن دەيمىز. قازىر ديماش ۇلگى بولىپ تۇر. ول تەك الەمگە تانىلعان ءانشى ەمەس، قازاقتىڭ ونەرىن ارقالاعان ازامات»، - دەدى كۇيشى.
اۆتور: التىناي ساعىندىقوۆا
