يتاليالىقتار قازاقتىڭ كيىزدەن جاسالعان ۇلتتىق ونىمدەرىنە قىزىعۋدا
ءبىر تاڭدانارلىعى، مۇندا ءبىر تەكەمەتتىڭ قۇنى 11 مىڭنان باستاپ 43 مىڭ دوللاردان اسادى.
اسىلىندە، تەكەمەت ەجەلدەن قازاق حالقىنىڭ قولدانىسىندا بولدى ەمەس پە؟ قىس قىستاۋعا، جاز جايلاۋعا كوشىپ-قونىپ جۇرگەن اتا-بابالارىمىز جۇننەن باسىلعان تەكەمەتتىڭ قادىر-قاسيەتى مەن ارتىقشىلىعىن سوناۋ عاسىرلاردا-اق ايرىقشا باعالاي بىلگەن.
الايدا قازىرگى كۇنى «جاڭا قازاق» بولۋعا ۇمتىلعان باۋىرلارىمىز تەكەمەتتى پايدالانۋ تۇرماق، ونى كورسە «چتو زا چۋش؟» دەپ تىجىرىناتىن بولدى. وكىنىشتىسى، ءبىزدىڭ ۇلت كەشەدەن بۇگىنگە جەتكەن تەكەمەتتىڭ دە ۋاقىت وتە كەلە باعا جەتپەس قۇندىلىققا اينالاتىنىن ءالى كۇنگە دەيىن باعامداي الماي وتىر.
مىسالى، وسىدان ءبىراز جىل بۇرىن يتاليالىق راففاەللە كاريەرري ەسىمدى ءبىر ازامات وزبەكستاندا تىگىن شەبەرحاناسىن اشىپ، وسىندا ۇلتتىق ونەردىڭ ەرەكشەلىكتەرىنە بارىنشا قانىعىپتى.
سودان ول فەرعانالىق شەبەرلەردىڭ قولىنان شىققان كيىزدەن باسىلعان كىلەم، توسەنىش، تۇسكىلەم، تەكەمەت سەكىلدى ۇلتتىق بۇيىمدارعا ايرىقشا قىزىققان. ال كەيىنىرەكتە سول قۇندىلىقتاردى ءوز ەلى - يتاليانىڭ نارىعىنا شىعارۋدىڭ جولىن تاۋىپ، شەكارا اسىرعان. ءسويتىپ، پىسىقاي جىگىت ميلاننان اشقان «التاي» دۇكەنىندە وزبەكتەردەن العان ۇلتتىق بۇيىمداردى بىرتىندەپ ساتىپ، پايدا تاۋىپ ءجۇر.
مۇنىڭ سەبەبى، كادۋىلگى كيىزدەن باسىلعان تەكەمەت يتاليالىقتار اراسىندا ەرەكشە سۇرانىسقا يە. سۇرانىستىڭ زور بولعانى سونشالىق، پىسىقاي راففاەللە كوپ ويلانباستان ءبىر تەكەمەتتى 11 مىڭنان 43 مىڭ دوللارعا ساۋدالاۋدا. ءبىز ءۇشىن وكىنىشتىسى سول، ەلىمىزدىڭ ءار ايماعىندا قاجەتسىز بوپ قالعان باعا جەتپەس تەكەمەت پەن سىرماقتى، جۇننەن باسىلعان قالىڭ كىلەمدەردى ءالى كۇنگە قاجەتكە جاراتۋدى ويلايتىن ەشكىم بولماي تۇر. دەسەك تە، «ەشتەن كەش جاقسى» اعايىن. ويلانايىق...
جومارت مولداحمەت ۇلى
«ايقىن»
