نۇرسۇلتان نازاربايەۆ: «يەسىز جەر جەتىم» دەگەن قازاقتىڭ ءسوزىن ۇمىتپايىق
«مەملەكەت باسشىسى كونستيتۋتسيانىڭ 26-بابىن وزگەرىسسىز قالدىرۋدى ۇسىنعانىن تاعى ءبىر مارتە ەسكە سالىپ: «نەگىزى، «قازاقستان ازاماتتارىنىڭ» ورنىنا «اركىم» دەگەن وزگەرىستى ەنگىزۋدى زاڭگەرلەر قاۋىمى تولىعىمەن قولدادى. سەبەبى سونىڭ ارقاسىندا ەلىمىزگە ينۆەستيتسيانى كوبىرەك تارتۋعا مۇمكىندىك بار. ينۆەستورلاردىڭ سەنىمى دە ارتا تۇسەدى. دەگەنمەن، اسىعىستىق جاساماي-اق قويالىق. بىزگە كونسەنسۋس كەرەك. وسىنى كەڭىنەن ءتۇسىندىرۋ قاجەت. ءبارىبىر ءبىز وعان كەلەمىز. جەر ماسەلەسىندە دە ونداي بولادى. ويتكەنى يەسىز جەر توزادى. ونىڭ قۇنارلىعى جوعالادى. سوندىقتان كۇندەردىڭ كۇنىندە ونى ءتۇسىنۋىمىز كەرەك. «يەسى جوق جەر جەتىم» دەگەن قازاقتىڭ ءسوزى بار. تالاي رەت كورگەنبىز، قۋراي ءوسىپ، جەردىڭ توزىپ كەتكەنىن. بۇل باپتى كەيىنگە شەگەرە تۇرايىق»، - دەدى نۇرسۇلتان نازاربايەۆ پارلامەنت پالاتالارىنىڭ بىرلەسكەن وتىرىسىندا.
پرەزيدەنت زاڭدى جولمەن يەلەنگەن كەز كەلگەن جەكە مەنشىكتىڭ كونستيتۋتسيامەن قورعالاتىنىنا باسا نازار اۋداردى. ەستەرىڭىزگە سالا كەتەيىك، 1- ناۋرىز كۇنى مەملەكەتتىك بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىنىڭ وتىرىسىنا قاتىسقان ەلباسى نۇرسۇلتان نازاربايەۆ كونستيتۋتسيانىڭ 26-بابىنا وزگەرىس ەنگىزبەۋدى ۇسىنعان بولاتىن.
اۆتور: ارمان اسقاروۆ
