اتاقتى ايتىسكەر داۋلەتكەرەي كاپ ۇلى مەن مۇحامەدجان تازابەكوۆ الەۋمەتتىك جەلىدە ايتىسىپ قالدى
ايگىلى ايتىسكەر مۇحامەدجان تازابەكوۆ ءوز پاراقشاسىندا «قازاقتىڭ ات ابزەلدەرى قادىم زاماننان قاجەتتىلىك پەن كومفورتتىڭ قۇرالى بولسا، بۇگىن ول الىس اۋىل مەن جاقىن مۋزەيدەن عانا كورەر ەتنوگرافيالىق ەتيۋد (ۇزىك) بولىپ بارادى. تۇرمىسىمىز تۇبەگەيلى وزگەرسە دە، ۇلتتىق ءتۇپ- تامىرىمىز وسىلاردان ەكەنىن ۇمىتپايىق»، - دەپ جازدى.
ايتىسكەردىڭ وسى جازباسىنا داۋىلپاز اقىن داۋلەتكەرەي كاپ ۇلى ولەڭمەن بىلايشا پىكىر ايتتى:
«جونجايلاۋدا وسكەسىن كەشىپ ايدىن،
تۇيەسى جوق قازاقتىڭ كوشى - قايعىم.
اراپتىڭ دالاسىنان قايتقان بولساڭ،
مۇحاجان، اتقا مىنسەڭ، وسىلاي ءمىن!»
مۇحامەدجان تازابەكوۆ تە قاراپ قالماي بۇعان ولەڭمەن جاۋاپ قايىردى:
«جوق مەندە قازاقيادان وزگە قۇندى وي،
قانىمنان، قاعىمنان دا بەزبەدىم عوي.
سىرتىمنان ارابيانىڭ دالاسىنا
اپارىپ، اكەپ جۇرگەن وزدەرىڭ عوي...»
داۋلەتكەرەي:
«مۇرتسىز ساقال جەلپىلدەپ تامام استا،
اراب بوپ اڭگىمە ايتىپ الاقاشپا.
استىڭا مىنگەنىڭ دە «ارابىدان»،
ات باسىن قاشان بۇردىڭ ماما اعاشقا؟!»
مۇحامەدجان:
«مىنگەنىم «ارابى» ەمەس، «جاپوندىق ات»،
باباڭنىڭ سيپاتى ەدى ساقال تىم-اق.
جولى ءتۇزۋ جان ايتسا جۇرت سەنبەيدى-اۋ،
اۋزى قيسىق پەندە ايتسا، زاكون ءبىراق...»، -
داۋلەتكەرەي:
«استىڭنان اقساماسىن «جاپوندىق ات»،
ال، «مۇرتسىز جاراسپايدى ساقال ءبىراق».
ارابى باس بىلمەيتىن اساۋ قۇساپ،
باسىڭدا الا قاشتىڭ، شو تام، برات؟!»
مۇحامەدجان:
«ەكەۋمىز نەعىلامىز ەندى الىسىپ،
باۋىر بوپ اياقتايىق، كەل، قاۋىشىپ!
نە مىنسە دە تۇسپەسىن قازاق اتتان،
جۇرەيىك ۇزەڭگىنى تەڭ قاعىسىپ!»
داۋلەتكەرەي:
مۇحاجان، بولا قالدىڭ قاي ناعاشى؟
جىگىتسىڭ اتتان تۇسپەس اينالاسى.
قاۋىشساق قاۋىشايىق وسىمەنەن،
مەن ەمەس، «اۋزى قيسىق باي بالاسى»!- دەپ ايتىستى اياقتادى.
جەلىدەگى ەكى اقىننىڭ ايتىسىنا پىكىر ءبىلدىرىپ، باعا بەرگەندەر دە بولدى.
