انا، ساعان ايتاتىنىم كوپ مەنىڭ
ەڭ اياۋلى جان انامىزعا ءبىز قانشا جاسقا كەلسەك تە ءالى بالا بوپ قالا بەرەمىز. سەبەبى، «انالار ەشقاشان قارتايمايدى...»
انا تۋرالى ليريكالىق ولەڭدەر توپتاماسىن ۇسىنامىز!
انا جايلى ەڭ جاقسى ءسوز...
«اكە، اكە، سەن ايتاتىن جاقسى سوزدەر كوپ ەدى،
ايتشى ەندى، انا جايلى ەڭ جاقسى ءسوز نە؟» دەدى،
انا جايلى...
انا جايلى پايعامبارلار سالەمى،
انا جايلى اقىنداردىڭ ولەڭى.
انا جايلى - قارا جەردىڭ توزگەنى،
انا جايلى - ۋاقىتتىڭ بەزبەنى،
انا جايلى ايتىلماعان ءبىر ءسوز بولسا الەمدە،
ول دا انانىڭ ايتا الماعان سوزدەرى.
انا جايلى جاقسى ءسوزدى ەستۋ ءۇشىن تىڭدا، ۇلىم،
تىنىشتىقتى، تاۋدى، كولدى، اي ساۋلەسىن، كۇن نۇرىن،
انا جايلى سەنىڭ ءتاتتى قيالدارىڭ، ارمانىڭ،
انا جايلى مەنىڭ بارلىق شىندىعىم.
مەن ايتاتىن جاقسى سوزدەر كوپ ەدى،
مەن دە انامدى جاقسى كورەم، سەبەبى!
بىلەسىڭ بە، بۇل الەمگە ادامدار،
انا جايلى ايتۋ ءۇشىن كەلەدى!
ادامزاتتىڭ ەڭ ءبىر اسقاق بار ءانى،
جىر ەتكەنمەن، ءپىر ەتكەنمەن انانى،
بۇل ءومىردى قالاي ءسۇرىپ وتكەنى
انا جايلى ايتقان ءسوزى بولادى.
انا جايلى - كەڭ دۇنيە - بەسىگىڭ،
انا جايلى امانات پەن كەشىرىم،
اناڭ ءۇشىن ەڭ جاقسى ءسوز دۇنيەدە
- ۇلىم، سەنىڭ ەسىمىڭ!..
ەرلان ءجۇنىس
راقمەت ساعان انا!
راقمەت، ساعان،
انا، مەنى تاستاپ كەتپەگەنىڭ ءۇشىن،
جەتىم بالا ەتپەگەنىڭ ءۇشىن!
تەكتىلىگىڭدى جوعالتپاي،
تەمەكى دە شەكپەگەنىڭ ءۇشىن!
راقمەت، ساعان، انا،
جامان جولعا تۇسپەگەنىڭ ءۇشىن،
ادال ەڭبەك ىستەگەنىڭ ءۇشىن!
بالاڭدى ويلاپ بولاشاق،
اراق-سىرا ىشپەگەنىڭ ءۇشىن!
راقمەت، ساعان، انا،
اركىمدى ءبىر سۇيمەگەنىڭ ءۇشىن،
اركىمگە ءبىر تيمەگەنىڭ ءۇشىن!
ۇرپاعىڭ ءۇشىن ۇنەمدەپ،
قىمبات كيىم كيمەگەنىڭ ءۇشىن!
راقمەت، ساعان، انا،
ماعان ءبارىن اپەرگەنىڭ ءۇشىن،
مىنەزىمدى كوتەرگەنىڭ ءۇشىن!
ون ەكى مۇشەمدى ساۋ قىلىپ،
دۇنيەگە اكەلگەنىڭ ءۇشىن!
راقمەت، ساعان، انا،
كىنام بولسا، كەشىرگەنىڭ ءۇشىن،
اۋىر بەينەت كەشىرگەنىڭ ءۇشىن!
اۋىرمايتىن، امان-ساۋ
ادام قىلىپ وسىرگەنىڭ ءۇشىن!
راقمەت، ساعان، انا،
سەنىڭ ءاربىر جىلاعانىڭ ءۇشىن،
جوقتان باردى قۇراعانىڭ ءۇشىن!
باقىتى ءۇشىن بالاڭنىڭ،
بارلىعىنا شىداعانىڭ ءۇشىن!
راقمەت، ساعان، انا،
ارسىز ىسكە بارماعانىڭ ءۇشىن،
ابورت جاساپ، الماعانىڭ ءۇشىن!
بىزدەردى ويلاپ، شىرىلداپ،
بار ءومىرىڭدى ارناعانىڭ ءۇشىن!
راقمەت، ساعان، انا،
بولاشاق مەنىڭ بالامنىڭ اتىنان.
بۇرىنعى اتا-بابامنىڭ اتىنان،
جەتى ميلليارد ادامنىڭ اتىنان،
ون سەگىز مىڭ عالامنىڭ اتىنان،
راقمەت، ساعان، انا.
الماس تەمىرباي
Massaget.kz
