ستۋدەنتتەرگە قازاقتىڭ تۇڭعىش عارىشكەرى توقتار اۋباكىروۆتىڭ اتاۋلى شاكىرت اقىسى بەرىلدى

استانا. قازاقپارات - ەلورداداعى «تۇران- استانا» ۋنيۆەرسيتەتىندە كەڭەس وداعىنىڭ باتىرى، قازاقستاننىڭ حالىق قاھارمانى، سىناقشى-ۇشقىش، زەرتتەۋشى- عارىشكەر، گەنەرال- مايور، تەحنيكا عىلىمدارىنىڭ دوكتورى، «تۇران- استانا» ۋنيۆەرسيتەتىنىڭ پروفەسسورى توقتار وڭعارباي ۇلى اۋباكىروۆتىڭ اتاۋلى ستيپەندياسىنىڭ يەگەرلەرىنە كۋالىكتەر تاپسىرۋ سالتاناتى ءوتتى، دەپ حابارلايدى قالا اكىمدىگىنىڭ سايتى.

اتاۋلى ستيپەنديانى بەرۋدىڭ ماقساتى - وقۋ، عىلىمي- زەرتتەۋ قىزمەتىن ىنتالاندىرۋ، بەلسەندى ومىرلىك ۇستانىمىنا يە، قابىلەتتى، دارىندى، باستاماشىل جانە ءتارتىپتى كۇندىزگى ءبولىم ستۋدەنتتەرىنە ماتەريالدىق قولداۋ كورسەتۋ، توقتار اۋباكىروۆتىڭ ەرلىكتەرىن قادىرلەي بىلۋگە تاربيەلەۋ بولىپ تابىلادى.

اتاۋلى ستيپەنديا تابىستاۋ سالتاناتىندا توقتار اۋباكىروۆتىڭ ءوزى ۇزدىكتەرگە كۋالىكتەر، باتىردىڭ قولتاڭباسىمەن ءومىرباياندىق كىتاپتار جانە ەستەلىك كادەسىيلار سىيعا تارتتى. ءىس- شاراعا استانا قالاسىنىڭ جاستار ساياساتى ماسەلەلەرى باسقارماسىنىڭ باسشىسى اسحات ورالوۆ، «تۇران- استانا» ۋنيۆەرسيتەتىنىڭ پروفەسسورلارى مەن ستۋدەنتتەرى قاتىستى.

«مەملەكەت دامۋىندا جەتىستىكتەرگە جەتۋ ءۇشىن ەلىمىز دارىندى جاستاردى قولداۋ قاجەتتىگىن ەلباسىمىز ۇنەمى ايتادى. التى جىلدىڭ ىشىندە داستۇرگە اينالعان ءىس- شارانىڭ بولاشاعى زور دەپ سەنەمىن. توقتار وڭعارباي ۇلىنا جانە «تۇران- استانا» وقۋ ورنىنىڭ ۇجىمىنا العىس ايتقىم كەلەدى»، - دەدى استانا قالاسىنىڭ جاستار ساياساتى ماسەلەلەرى باسقارماسىنىڭ باسشىسى اسحات ورالوۆ سالتاناتتى جيىندا.

اتاپ ايتقان ءجون، اتاۋلى ستيپەنديا 2011 -جىلدىڭ 30 -تامىز كۇنى اتالمىش وقۋ ورىنىنىڭ عىلىمي كەڭەسىنىڭ شەشىمىمەن قۇرىلعان بولاتىن. ءار وقۋ جىلى اتاۋلى ستيپەنديا تەك 5 ۇزدىك ستۋدەنتكە عانا بەرىلەدى.