وليمپيادا قارساڭىندا ءيت ەتىن ساتاتىن ەڭ ۇلكەن بازاردى جاپپاق

استانا. قازاقپارات - وڭتۇستىك كورەيانىڭ سوننام قالاسىندا بيلىك ەلدەگى ءيت ەتىن ساتاتىن ەڭ ۇلكەن بازاردى قايتا قۇرۋعا كىرىستى. ال ۇكىمەتپەن كەلىسىم جاساعان ساۋداگەرلەردىڭ ءبىرازى ۇسىنعان وتەماقىنى ازسىنىپ وتىر.

سەۋلگە ىرگەلەس قالادا ورنالاسقان موران بازارى 1960 - جىلدارى اشىلعان. مۇندا ساتىلمايتىن دۇنيە جوق. جانۋارلاردان باستاپ انتيكۆارياتقا دەيىن بار. جىل سايىن سوننامدا تىرىدەي، ياكي، سويىپ 80 مىڭ ءيت ساتىلادى. وڭتۇستىك كورەيادا تۇتىنىلاتىن ءيت ەتىنىڭ ۇشتەن ءبىرى وسى بازاردان وتەدى.

ال مۇندا جەتكىزىلەتىن يتتەر ايماقتاردا وسىرىلەدى. بازارعا يتتەردى ءۇستى- ۇستىنە تيەپ اكەلەتىندىكتەن ولاردىڭ جارتىسى جولدا ءولىپ قالادى. ساتىپ الۋشىلار الاتىن يتتەرىن وزدەرى تاڭدايدى. ساتۋشىلار جانۋارلاردى تىرىدەي ساتادى نە بولماسا سول ارادا سويىپ، قانىن سورعىتادى.

حايۋاناتتاردى قورعاۋ ۇيىمدارىنىڭ وكىلدەرى يتتەردى ۇرىپ- سوعاتىنىن، ەلەكتر توعىمەن ولتىرەتىنىن ايتىپ بۇل جاعدايدى تالاي مارتە سىنعا العان. ال پحەنچحاندە بەلسەندىلەر 2018 -جىلعى وليمپيادا قارساڭىندا سەۋلدەن يتتەرگە كورسەتىلەتىن قاتىگەزدىكتى توقتاتۋدى تالاپ ەتتى.

 قازىر بيلىكپەن كەلىسىم جاساعان 22 ءىرى ساۋداگەر وتەماقى كولەمىن ۇلعايتۋدى سۇراپ وتىر. «بىزگە بەرىلگەن كومەكپەن كەلىسپەيمىز. يتتەردى بازاردا سويماساق ۇلكەن شىعىنعا ۇشىرايمىز. كليەنتتەرىمىزدىڭ 80 پايىزى جاڭا سويىلعان ءيت ەتىن ساتىپ الۋعا كەلەدى. ولارعا تاۋار ۇسىنا الماساق ءبىز نە ىستەيمىز؟» - دەگەن ءۋاج ايتادى.

بيلىك مۇنداعى ساۋداگەرلەرگە باسقا بيزنەس تۇرىمەن شۇعىلدانۋعا كەڭەس بەرگەن. سەبەبى وڭتۇستىك كورەياداعى مال سويۋ جانە ەت ونىمدەرىن ساۋدالاۋعا قاتىستى سانيتارلىق تالاپتار ءيت ساۋداسىنا جۇرمەيدى. بۇل وسى سالانى رەتكە كەلتىرۋگە كەدەرگى.

 كورەيانىڭ ستاتيستيكا قىزمەتىنىڭ دەرەگىنە سۇيەنسەك، 2010 -جىلى ەلدەگى جۇزدەگەن ارنايى كاسىپورىنداردا 900 مىڭ ءيت بولعان.  

ولاردىڭ ايتۋىنشا ءيت ەتى ەر ادامداردىڭ دەنساۋلىعىنا جاقسى اسەر ەتەدى. شارشاۋعا، ءتۇرلى اۋرۋلارعا ەم كورىنەدى.  

دەرەككوز: newsru.com