ونەر جۇلدىزدارى استاناداعى مۇراجاي تاماشالاعاندارعا قىزمەت ەتتى

استانا. قازاقپارات - ۇلتتىق مۋزەيدە ەلىمىزدىڭ تانىمال ونەر جۇلدىزدارىنىڭ قاتىسۋىمەن «جۇلدىزدى گيد» جوباسى بولىپ ءوتتى.

شارادا وتاندىق ونەر جۇلدىزدارى ۇلتتىق مۋزەيگە كەلۋشىلەرگە ارنايى ەكسكۋرسيا جۇرگىزدى. مۋزەي قوناقتارى انشىلەر مەن اكتەرلەردى ەكسكۋرسيا جۇرگىزۋشىسى رەتىندە تانىپ، وزدەرىنە قاجەتتى اقپاراتتار الدى، دەپ حابارلايدى مۋزەيدىڭ باسپا ءسوز قىزمەتى.

«جۇلدىزدى گيد» جوباسى بارىسىندا مۋزەيدىڭ التىن زالىن - ءانشى التىناي جورابايەۆا، تاريح زالىن - اكتەر ءادىل احمەتوۆ، تاۋەلسىز قازاقستان زالىن - ءانشى ينديرا راسىلحان، ەتنوگرافيا زالىن - اكتەر قۋاندىق قىستىقباي، استانا زالىن - ءانشى شاحاريزات سەيداحمەت تانىستىردى. ەكسكۋرسوۆود جۇلدىزداردىڭ ءوز ىستەرىنە بەرىلىپ كەتكەندەرى سونداي، جۋرناليستەردىڭ سۇراقتارىنا دا اسىعىس جاۋاپ بەردى.

التىن زالىن تانىستىرۋشى التىناي جورابايەۆا ءوز اسەرىمەن بولىسە كەلە: «العاشقى تانىستىرىلىمدا ءبىراز قوبالجىدىم. ءبىراق، ءوز ەلىمىزدىڭ وسىنشا بايلىعى بار ەكەنىن كورىپ، ونى ءوز اۋزىممەن حالىققا تانىستىرا ءجۇرىپ ارقالانىپ كەتكەندەي بولدىم. ءدال قازىر التى رەت تانىستىرىلىم جۇرگىزدىم. وسى التى تانىستىرىلىمدا مەنىڭ ەلىمە دەگەن سۇيىسپەنشىگىم التى ەسەگە ارتتى دەسەم دە بولادى»، - دەدى.

تاريح زالىن تانىستىرۋشى تانىمال اكتەر ءادىل احمەتوۆ: «شىنىمدى ايتسام، كوپتەگەن وقىعان مالىمەتتەردى قايتا قاراپ، مۋزەيدەگى ءار جادىگەرمەن جەكە تانىسقانىمدى ساناماعاندا، اكتەر رەتىندە بۇل جۇمىس ماعان قاتتى قيىندىق تۋعىزعان جوق. سەبەبى، اكتەر ادام ساحنادا، كينودا ءارتۇرلى وبرازدار سومدايدى. ال بۇگىن مەن جاي عانا كينوداعى ەكسكۋرسوۆودتىڭ ءرولىن سومداۋشىمىن»، - دەپ بۇگىنگى جۇمىسى جاڭا ىزدەنىستەرگە دە باستاۋى مۇمكىن ەكەنىن ايتىپ ءوتتى.

تاۋەلسىز قازاقستان زالىن تانىستىرۋشى ينديرا راسىلحان بولسا: «تاۋەلسىزدىگىمىزدى العان كەزدە مەن ەس ءبىلىپ قالعان بولاتىنمىن. جانە سول تاۋەلسىزدىگىمىزدىڭ 25 جىلدىق عۇمىرىنىڭ كۋاسىمىن دەپ ايتا الامىن. ءبىراق، وسى جوبا اياسىندا مۋزەيگە كەلىپ، «تاۋەلسىز قازاقستان» زالىن تانىستىرۋ ارقىلى ءبىز ءوز تاۋەلسىزدىگىمىز جايىنداعى كوپتەگەن دۇنيەلەردى بىلە بەرمەيتىنىمىزگە كوزىم جەتتى»، - دەپ بۇل شارانىڭ ءوزى ءۇشىن جاڭالىققا تولى بولعانىن اتاپ ءوتتى.

ال ەلىمىزدىڭ تۇرمىسى مەن سالت-ءداستۇرى كورىنىس تاپقان ەتنوگرافيا زالىن تانىستىرا ءجۇرىپ بەلگىلى اكتەر قۋاندىق قىستاقباي: «مۋزەي مەن تەاتر ءبىر-بىرىمەن تىعىز بايلانىستى. ءبىز ساحنادا قويىلىم ارقىلى تاريحىمىزعا تەرەڭىرەك بويلاۋعا تىرىسساق، مۋزەيدەگى جادىگەرلەر سول تاريحتىڭ تىلىندە سويلەيدى. بۇگىنگى ءىس- شارا كەلۋشىلەر ءۇشىن دە، جۇلدىزدار ءۇشىن دە ۇلكەن جاڭالىق بولدى. ويتكەنى، وسى جوبا ارقىلى بىرىنشىدەن ءوزىمىزدى باسقا قىرىمىزدان كورسەتسەك، ەكىنشىدەن ءوز تاريحىمىز بەن ءداستۇرىمىزدى تاعى باسقا قىرىنان تانىپ جاتقان جايىمىز بار»، - دەپ جوبا جونىندەگى ويلارىمەن ءبولىستى. شارا سوڭىندا كەلۋشىلەردىڭ نازارىنا جۇلدىزداردىڭ قاتىسۋىمەن كونسەرت ءوتتى.