قازاقستاندا قۇراستىرىلاتىن كولىك ءتۇرى ارتۋدا
مامانداردىڭ ايتۋىنشا، ءىرى ءوندىرىس ورىندارىنىڭ قاجەتىن وتەۋگە ابدەن جارايدى. بۇگىنگى فورۋم اياسىندا كولىكتىڭ بولشەكتەرىنەن باستاپ، وعان كەرەكتى قۇرال- سايماندار جانە تەحنيكانىڭ سان ءتۇرىن كورۋگە بولادى. حالىقارالىق شارا بولعاندىقتان، وزگە ەلدەردەن دە كەلگەندەر بارشىلىق. ءبارى وزىنە تۇتىنۋشى ىزدەۋدە.
تاتيانا ارابادجي، ماركەتولوگ:
- جاسىراتىنى جوق قازىر جاڭا كولىككە سۇرانىس ازايعان. جاقىن جىلدارى سۇرانىس بۇرىنعى دەڭگەيگە كوتەرىلۋى مۇمكىن. كاسىپورىندار سول كەزەڭگە دايىن بولۋى كەرەك. ءبىر ەل اۋماعىمەن شەكتەلۋ جارامايدى. قيىن بولسا دا ەكسپورتقا شىعۋعا ۇمتىلعان دۇرىس. نازاردا ۇستاۋدى قاجەت ەتەتىن تاعى ءبىر دۇنيە بار. كولىك قۇراستىرۋدى يگەردىك. ءبىراق وسى دەڭگەيدە تۇرىپ قالماۋ كەرەك. نارىق سۇرانىسىنا بەيىمدەلە بىلگەن ءجون.
امانياز ەرجانوۆ، ق ر ينۆەستيتسيالار جانە دامۋ مينيسترلىگىنىڭ كوميتەت ءتوراعاسى:
- الداعى ۋاقىتتا ەلەكتروموبيلدەرگە جانە زالالسىز وتىنمەن جۇرەتىن كولىككە سۇرانىس ارتادى. قازاقستاندا بۇل بويىنشا سىناقتىق جۇمىستاردى ءساتتى اياقتاپ، ەلەكتروموبيل قۇراستىرۋ باستاماسى ماقۇلداندى.
2016 -جىلدىڭ جەلتوقسانىندا الماتىلىق كاسىپورىن اسا اۋىر جۇك كولىكتەرىن قۇراستىرۋدى قولعا العان. قازاقستاندىق ۇلەس 50 پايىز. ەۋرو-4 كلاستى تەحنيكا 25 توننا جۇك كوتەرۋگە قاۋقارلى. قۇنى - 20 ميلليون تەڭگە.
رۋسلان بايقابىلوۆ، زاۋىتتىڭ كوممەرتسيالىق ديرەكتورى:
- بۇل جۇك كولىگىنىڭ بيىل ءجۇز داناسى قۇراستىرىلماق. سۇرانىس بولسا، ارتتىرامىز. ونى ورتالىق ازيا ەلدەرىنە دە ەكسپورتتاۋ كوزدەلگەن. قازىردىڭ وزىندە وزبەكستانداعى كاسىپورىننىڭ بىرىمەن كەلىسىم جاسادىق.
وسىلايشا، قازاقستان نارىعى قاجەتتى تەحنيكا تۇرلەرىمەن بىرتىندەپ تولىعىپ كەلەدى. قانشا شىعارىلىپ جاتقانىن مىنا قابىرعادان كورۋگە بولادى. بۇل جەردە جەتپەي تۇرعانى ەكى كولىك. ءبىرى قوقىس جيناۋعا، ەكىنشىسى جول بويىن سىپىرۋعا ارنالعان تەحنيكا. ماماندار بۇل كەمشىلىكتى وسى جىلدىڭ كۇزىندە تولتىرامىز دەپ وتىر.
قازاقستاندا كولىك قۇراستىرۋ 2010 -جىلى باستالىپ، بۇگىنگە دەيىن ءوندىرىس قۋاتى 10 ەسەگە وسكەن. قازىر بۇل كاسىپپەن اينالىساتىن كاسىپورىندار سانى 40 تان اسادى. وتاندىق اۆتوموبيلدەردىڭ ساتىلۋىنا كەلسەك، 2015 -جىلى 97 مىڭ 469 كولىك ءوتىپتى. ال بىلتىر سۇرانىس 46 مىڭ 712 دانا بولعان.
www.khabar.kz 
