رەسەيدىڭ «قوش اعاش» اۋدانىنىڭ قازاق باسشىسى اۋەلحان جاتقانبايەۆ تۇتقىندالدى - كەسكىن
وقيعا 22 -اقپان كۇنى ورىن العان. ول وتكەن جىلى قاڭتار ايىندا مەكتەپ قۇرىلىسىن اۋكسيون ارقىلى ساتۋدا جەڭىسكە جەتۋى ءۇشىن ءباسساۋداعا قاتىسۋشىدان 3 ميلليون رۋبل كولەمىندە پارا العان دەپ ايىپتالىپ وتىر. ءوزىنىڭ ەشقانداي كىناسىز ەكەنىن ايتقان اۋەلحان ءجازيت ۇلى جەدەل- جاردەم قىزمەتكەرلەرىن شاقىرتۋعا ءماجبۇر بولدى. سەبەبى ونىڭ دەنساۋلىعى سىر بەرە باستاعان. ال وسى وقيعاعا بايلانىستى اۋەلحان جاتقانبايەۆتىڭ ۇلى مەيىرىم جاتقانبايەۆ بىلاي دەيدى:
«اسسالاۋماعالايكۋم، قانداستار!!! مەن رەسەيدىڭ التاي ولكەسى قوش اعاش اۋدانىنىڭ تۇرعىنىمىن. اكەم - جاتقانبايەۆ اۋەلحان جازيت ۇلى - وسى اۋداننىڭ اكىمى. وسىندا تۇراتىن 12000 قازاعىنا بۇكىل ءومىرىن سارپ ەتىپ، اياماي ەڭبەك ەتتى. جەرگىلىكتى حالىقتىڭ قولداۋىمەن 4 مارتە اۋدان اكىمىنە سايلانىپ، جۇمىسىن ادال اتقاردى. ەلىنىڭ ءۇمىتىن اقتاپ، كەلەشەكتە وسەر ۇرپاعىنا جول سىلتەدى. بۇل ادامعا ەندى جالا جاۋىپ، ەشبىر دالەلسىز قاماپ تاستادى. دەنساۋلىعى ونسىز دا ناشار، قان قىسىمى جوعارى جانە جۇرەگى ناشار. جەرگىلىكتى تۇرعىندار، ەل- جۇرتى، اعايىنى جينالىپ الاڭعا شىقسا، بوستاندىق پەن ادىلەتتىلىك سۇراسا، پوليتسيا ءبارىن شەتىنەن قۋىپ قامايمىز دەپ قورقىتۋدا. بۇكىل حالىق قايعىرىپ وتىر. كەلەسى كەزەكتە جانۇياسىنا قاۋىپ ءتونىپ تۇر. ۇلكەن قىزى - مەنىڭ اپايىم ەكەۋىمىز قازاقستان ازاماتىمىز، ءبىزدى دە قاماۋعا الماقشى. الىستاعى قانداستارىڭىزعا قول ۇشتارىڭىزدى سوزۋىن سۇرايمىز».
اۋەلحان ءجازيت ۇلى وسى وڭىردە العاش رەت ناۋرىز، بۇركىت تويىن جانە العاش بولىپ قازاق كۇرەسىنەن ازيا چەمپيوناتىن وتكىزگەن. كەڭەس وداعى قۇلاعاننان كەيىن ەڭ العاش مەشىت سالدىرعان ازامات. قازىر اۋەلحان جاتقانبايەۆ قاماۋدا.
