قازاقستان اۋانىڭ لاستانۋى جاعىنان الەمدىك رەيتينگتىڭ وندىعىنا ەندى

استانا. قازاقپارات - قازاقستان اۋاسىنىڭ لاستانۋى جاعىنان ورتالىق ازيادا الدىڭعى ورىنداردان كورىندى.

بۇل تۋرالى تۋرالى بريتاندىق The Eco Experts ۇيىمىنىڭ زەرتتەۋىندە ايتىلعان، دەپ حابارلايدى قازاقپارات. «اتالعان ۇيىم ساراپشىلارى قورشاعان ورتانىڭ 5 فاكتورىن نەگىزگە الا وتىرىپ، 135 ەلدەن دەرەكتەر جيناقتادى. وسى ورايدا جان باسىنا شاققانداعى ەنەرگيانى تۇتىنۋ، وتىن جاعۋدان كومىرقىشقىل گازىنىڭ (سو2) دەڭگەيى، اۋانىڭ لاستانۋى، اۋانىڭ لاستانۋىنا بايلانىستى ءولىم- ءجىتىم جاعدايلارى، جاڭاراتىن ەنەرگيا كوزدەرى باعىتىنداعى ماسەلەلەر قامتىلدى»، - دەپ جازادى ca-news.org.

زەرتتەۋ ناتيجەسى بويىنشا قىرعىزستان ورتالىق ازيادا قورشاعان ورتاداعى ۋلاعىش قۇرامداسى جاعىنان تازا مەملەكەت بولىپ تانىلدى. اتالعان كورسەتكىش اياسىندا ەكىنشى ورىننان تاجىكستان كورىندى. ال ورتالىق ازيادا ەڭ توكسيندى مەملەكەتتەر رەتىندە قازاقستان مەن تۇركمەنستان انىقتالدى. The Guardian مالىمەتىنشە، 2020 -جىلعا قاراي قىتاي جاڭاراتىن ەنەرگيا كوزدەرىنە 292 ميلليارد فۋنت ستەرلينگ ينۆەستيتسيا سالۋعا ۇمتىلۋدا. بۇل تۇرعىدا ق ح ر «جاسىل» بولاشاق جولىنا بەلسەندى قادامدار باستاعانى كورىنىپ وتىر.

سونىمەن قاتار ەۋروپالىق ەلدەر اراسىندا ليۋكسەمبۋرگ ەڭ توكسيندى بولىپ تىركەلدى. بۇل مەملەكەت كورشىلەس ەلدەردەن كەلەتىن لاستاعىش قۇرامداستان قاتتى زارداپ شەگۋدە، اسىرەسە بۇعان گەرمانيا مەن بەلگيا اسەر ەتۋدە. سونىمەن، نازارلارىڭىزعا الەمدە توكسيندىك دەڭگەيى جاعىنان العاشقى وندىققا ەنىپ وتىرعان ەلدەردى ۇسىنامىز:

- ساۋد ارابياسى؛

- كۋۆەيت؛

- قاتار؛

- باحرەين؛

- بىرىككەن اراب امىرلىكتەرى؛

- ومان؛

- تۇركمەنستان؛

- ليۆيا؛

- قازاقستان؛

- ترينيداد جانە توباگو.

بايانداماعا سايكەس، توكسيندىگى ەڭ تومەن ەلدەردىڭ قاتارىنان كەنيا، موزامبيك جانە ەفيوپيا تابىلدى. وندىرىستىك قۋاتتاردىڭ جوقتىعىنان بۇل مەملەكەتتەردە اۋانىڭ لاستانۋى بايقالمادى. بۇگىندە افريكادا اۋىزسۋ ساپاسى ناقتى پروبلەماعا اينالىپ وتىر.

اۆتور: رۋسلان عابباسوۆ