گرۋزيادا حالىقارالىق دارەجەدەگى جۇرگىزۋشى كۋالىگىن ءبىر كۇندە الۋعا بولادى

استانا. قازاقپارات - گرۋزيادا جۇرگىزۋشى كۋالىگىن ءبىر- اق كۇندە الۋعا بولادى. ول ءۇشىن جول ەرەجەلەرى بويىنشا تەست سۇراقتارىنا جاۋاپ بەرىپ، جاتتىعۋ الاڭىنداعى پراكتيكالىق ەمتيحاننان سۇرىنبەسەڭىز بولعانى.

 جاقسى دايىندىقپەن كەلسەڭىز، سىناقتان ءوتۋ ءۇشىن بار- جوعى ءبىر ساعاتتىڭ ءوزى جەتكىلىكتى. سونداي- اق بۇل مۇمكىندىكتى گرۋزيا ازاماتتارى عانا ەمەس، شەتەلدىكتەر دە پايدالانا الادى.

حالىقارالىق دارەجەدەگى جۇرگىزۋشى كۋالىگىنە يە بولعىسى كەلگەن وزگە ەل ازاماتتارىنىڭ گرۋزياعا ارنايى ات باسىن بۇراتىنى دا سودان. گرۋزيادا جۇرگىزۋشى كۋالىگىن ساناۋلى مينۋتتاردا- اق قولعا تۇسىرۋگە بولادى. ول ءۇشىن سىزدەن دەنساۋلىق انىقتاماسى مەن ءتولقۇجات تالاپ ەتىلەدى جانە ەڭ باستىسى جۇرگىزۋشىلىك قابىلەتىڭىزدەن بولەك جول ەرەجەلەرىن جاتقا ءبىلۋىڭىز قاجەت. ال ارنايى كۋرستاردان ءوتۋ بولاشاق جۇرگىزۋشى ءۇشىن مىندەتتى ەمەس.

 يمەدا ماكاساراشۆيلي، گرۋزيا ءى ءى م سەرۆيس ورتالىعىنىڭ جەكتەكشىسى:

 - ەمتيحانعا كىرۋ ءۇشىن باج سالىعىن تولەۋىڭىز كەرەك. سىناقتان سۇرىنبەي وتسەڭىز، ءوز قالاۋىڭىزبەن 5 تاۋلىك ىشىندە جۇرگىزۋشى كۋالىگىن الا الاسىز. ال قوسىمشا اقىسىن تولەسەڭىز، قۇجاتقا سول كۇنى- اق قول جەتكىزۋگە بولادى. «ا» جانە «ب» كاتەگوريالارى ءۇشىن الدىن الا اۆتومەكتەپتەردە وقۋ تالاپ ەتىلمەيدى. الايدا جۇك كولىكتەرى مەن اۆتوبۋس جۇرگىزۋشى بولعىسى كەلەتىندەردىڭ الدىن الا دايىندىقتاردان ءوتۋى مىندەتتى.

ءبىرىنشى قادام - جول ەرەجەلەرى بويىنشا تەست تاپسىرۋ. 30 سۇراققا جاۋاپ بەرۋ بارىسىندا ءۇش رەت قاتەلەسۋگە مۇمكىندىگىڭىز بار. اتتەستاتسيانى 8 تىلدە وتكىزۋگە رۇقسات ەتىلگەن. سۇراقتار تۇسىنىكتى بولۋى ءۇشىن ءاربىر جاۋاپ نۇسقاسى D3 فورماتىندا بەينەروليكتەرمەن كومكەرىلگەن. تاعى ءبىر ەرەكشەلىك - ەمتيحان باعدارلاماسىن ازىرلەۋشىلەر ءتۇرلى مىسالدار كەلتىرۋ بارىسىندا تەك گرۋزيادا بار اۆتوموبيل جولدارىن پايدالانعان. ودان ارى ءى ءى م بولىمشەسىنىڭ اۋلاسىندا تاجىريبەلىك ەمتيحان تاپسىراسىز. ول بار- جوعى 15 مينۋتقا سوزىلادى.

سىناق بارىسىندا جولاقتار مەن ەستاكادالاردى شاتاستىرىپ الماي، اۆتوتۇراقتار مەن گاراجدارعا كىرەردە كولىگىڭىزدى ەمىن- ەركىن باسقارا ءبىلۋىڭىز كەرەك. بىرنەشە كەزەڭ قورىتىندىسى بويىنشا سۇرىنبەي وتكەن ازامات جۇرگىزۋشى كۋالىگىنىڭ يەسى اتانادى.

 گيگا چادۋنەلي، ەمتيحان تاپسىرۋشى:

- دايىندىعىن پىسىقتاپ كەلگەن كىسى ەمتيحاننان ەش قيىندىقسىز وتە الادى. باستىسى قوبالجىماۋ قاجەت. مەن ءۇشىن ءبارى العاشقى مۇمكىندىگىمنەن- اق ءساتتى اياقتالدى. بالا كەزدەن كولىك تىزگىنىندە جۇرسەم دە، جۇرگىزۋشى كۋالىگىن ەندى عانا قولىما الدىم.

 حالىقارالىق دارەجەدەگى جۇرگىزۋشى كۋالىگىنە يەلىك ەتۋگە وسى ەل ازاماتتارىنىڭ عانا ەمەس، شەتەلدىكتەردىڭ دە مۇمكىندىگى بار. وزگە مەملەكەتتەرمەن سالىستىرعاندا بۇل قۇجاتتى الۋ گرۋزيادا اناعۇرلىم وڭاي. الايدا ۇكىمەتتەگىلەر الداعى ۋاقىتتا ەمتيحان تاپسىرۋشىلارعا قويىلاتىن تالاپتاردى كۇشەيتپەك. كۇزدەن باستاپ تاجىريبەلىك تاپسىرمانى قالا كوشەلەرىندە تاپسىرۋ ەرەجەسى ەنگىزىلۋى مۇمكىن. ول كەزدە سىناقتان وتۋشىلەر قازىرگىدەي الدىن الا دايىندالعان ماكەتتەردەن عانا ەمەس، شىنايى كەدەرگىلەرمەن دە بەتپە- بەت كەلمەك.

www.24.kz