سينتەتيكالىق كيىمدە بولاتىن پلاستيك تالشىقتارى مۇحيتتارعا زالال كەلتىرە باستادى

استانا. قازاقپارات - سينتەتيكالىق كيىمدى جۋۋ كەزىندە نەمەسە قوزعالىس ۇستىندەگى كولىك دوڭگەلەگىنەن ءبولىنىپ، ۇشاتىن پلاستيكتىڭ ميكروسكوپيالىق تالشىعى الەمدىك مۇحيتتىڭ لاستانۋىنىڭ نەگىزگى كوزدەرىنىڭ ءبىرى بولىپ تابىلادى، دەيدى عالىمدار.

كەي جەرلەردە اتالمىش پلاستيك تالشىقتارى كوزگە كورىنەتىن وزگە لاستاۋىش زاتتارعا قاراعاندا مۇحيتتارعا ەداۋىر زالال كەلتىرۋدە. حالىقارالىق تابيعاتتى قورعاۋ وداعىنىڭ سوڭعى ەسەپتەرىنىڭ بىرىندە ايتىلعانداي، پلاستيكتىڭ ميكروتالشىقتارى مۇحيتتاردى لاستايتىن پلاستماسسانىڭ جالپى كولەمىنىڭ 15 تەن 31 پايىزىنا دەيىن قۇرايدى.

ساندىق ماندە بۇل جىلىنا 9,5 ميلليون توننا ميكروپلاستيكا. «مۇحيتتاعى ميكروتالشىقتاردىڭ باسىم بولىگى سينتەتيكالىق كيىمدى جۋۋدان نەمەسە دوڭگەلەكتەن كەلگەن دەپ ەسەپتەيمىز»، - دەدى بي- بي- سيمەن اڭگىمەلەسۋ بارىسىندا تەڭىزدەردىڭ لاستانۋى بويىنشا باعدارلاما باسشىسىنىڭ ورىنباسارى فرانسۋا سيمار.

«ميكروتالشىق قورەكتەنۋ تىزبەگىنىڭ بولشەگىنە اينالدى. پلاستيكا اعىنىن بىرلەسىپ تەجەيىك»، - دەدى ەكولوگ.

زەرتتەۋشىلەردىڭ ايتۋىنشا، ميكروپلاستيكا كوزدەرىنىڭ تاعى ءبىرى - كوسمەتيكا پايدالانۋدان بولاتىن قالدىقتار. بۇل پروبلەما ءىشىنارا شەشىلۋدە: Waitrose, John Lewis, Marks  مەن Spencer جانە Body Shop سياقتى كوپتەگەن ءىرى بريتاندىق بولشەك جەلىلەر پلاستيكا قوسىلماعان كوسمەتيكا مەن تاۋارلاردى ساتۋدا.

2017 -جىلدىڭ سوڭىندا بىرنەشە ءىرى كومپانيا سولاردان ۇلگى الماق. الايدا، دوڭگەلەكتەگى جانە كيىمدەگى پلاستيكتى جويۋ كۇردەلىرەك بولادى دەپ سانايدى ەكولوگتار.