ەلباسى شىڭعىس حاندى قازاق دەۋشىلەرگە قاتىستى پىكىر ءبىلدىردى
«توميريس پەن شىڭعىس حان قازاق ەكەن دەگەندە مەنىڭ ءىشىم اۋىرادى. ءبىزدىڭ باسقا ايتاتىن ءسوزىمىز جوق پا؟ باسىمىزدى ارتقا بۇرىپ، الدىعا قالاي جۇرەمىز؟ الدىعا قارايتىن كەز كەلدى. توني بلەردىڭ پارلامەنتتە ايتقان ءسوزى بار ەدى. « ۇلى بريتانيانىڭ ۇلى تاريحى بار. ءبىراق ءبىز مۇراجايلاردا ءومىر سۇرە المايمىز، ادامداردى كومپيۋتەرگە وتىرعىزاتىن ۋاقىت كەلدى» دەگەن. سول سياقتى ءبىز دە ويلانۋىمىز كەرەك. سىزدەر، عالىمداردان، دۋالى اۋىزدان شىعاتىن ءسوز بولۋى كەرەك. سوندىقتان، جاڭا جاعدايدا قازاقستاننىڭ بولاشاق ۇرپاعى قانداي بولۋى كەرەك دەگەن ساۋال تۋىندايتىنى زاڭدى. ءبىز تاۋەلسىزدىككە قول جەتكىزىپ، ۇلى دالا توسىندە تۇعىرلى مەملەكەت قۇرعان اعا بۋىنبىز، وسى وتىرعاندا. بىزگە وسى كيەلى جەتىستىكتەرىمىزدى باياندى ەتەتىن، ءبىزدىڭ اسقاق بولمىسىمىزدى ەسەلەي تۇسەتىن زەرەك تە، زياتكەر ۇرپاق كەرەك. ول قانداي ۇرپاق؟ ول - رۋحاني الەمى باي، تاۋەلسىزدىكتىڭ كيەسىن ءپىر تۇتاتىن، ءدىنى مەن مادەنيەتىن قاستەرلەيتىن دەنساۋلىعى مىقتى، ورەسى بيىك ازامات. سول ازاماتتى دايىنداۋىمىز كەرەك. وزىق تەحنولوگيالار مەن عىلىمنىڭ بىلگىرى اتانعان جاھاندىق دەڭگەيدەگى مامان بولىپ، ءار جەردە جۇمىس ىستەي الاتىن بولۋى كەرەك. ول ءۇشىن انا تىلىمەن بىرگە اعىلشىن ءتىلىن يگەرۋ كەرەك. سوندا عانا قازاقتىڭ ازاماتى دۇنيەجۇزىلىك باسەكەگە قابىلەتتى بولادى»، - دەدى ق ر پرەزيدەنتى.
ايتا كەتەيىك، بۇگىن، 22 -اقپان كۇنى اباي اتىنداعى قازاق مەملەكەتتىك اكادەميالىق وپەرا جانە بالەت تەاترى عيماراتىندا ق ر پرەزيدەنتى، ق ر ۇ ع ا اكادەميگى نۇرسۇلتان نازاربايەۆتىڭ قاتىسۋىمەن اكادەميانىڭ 70 جىلدىق مەرەيتويىنا ارنالعان جالپى جينالىستىڭ سالتاناتتى سەسسياسى ءوتتى. سەسسيا جۇمىسىنا اكادەميكتەر، كوررەسپوندەنت- مۇشەلەرى، ق ر ۇلتتىق عىلىم اكادەمياسىنىڭ قۇرمەتتى مۇشەلەرى، جوعارى وقۋ ورىندارىنىڭ رەكتورلارى، ع ز ي ديرەكتورلارى، ەلدىڭ كورنەكتى قوعامدىق جانە مادەنيەت قايراتكەرلەرى، شەتەلدىك قوناقتار، عىلىم اكادەميا پرەزيدەنتتەرى رەسەي فەدەراتسياسىنان فورتوۆ ۆ. ە. قىرعىزستاننان ەركەبايەۆ ا. ە. ، گرۋزيادان كۆەسيتادزە گ. ي. ، مولدوۆادان دۋكا گ. گ. ، تاتارستاننان سالاحوۆ م. ح. ، بەلارۋس ۇ ع ا پرەزيديۋمى ءتوراعاسىنىڭ ورىنباسارى كيلين س. يا. ، ۋكراينا ۇ ع ا ۆيتسە- پرەزيدەنتى كوشەچكو ۆ. گ. ، وزبەكستان عا جالپى جانە بەيورگانيكالىق حيميا ينستيتۋتىنىڭ ديرەكتورى زاكيروۆ ب. س. ، ازەربايجان ۇ ع ا ءتورالقا اكىمشىلىگىنىڭ عىلىم جانە ءبىلىم بەرۋ باسقارماسىنىڭ باستىعى سادىگوۆ ا. ، تاجىكستان رەسپۋبليكاسى عا اكادەميگى م. يلولوۆ «Elsevier» باسقارما ءتوراعاسى جانە ستراتەگيالىق دامۋ جەتەكشىسى، «Relax group» ديرەكتورلار كەڭەسىنىڭ مۇشەسى يونگ سۋك چي، ق ح ر- نىڭ الماتى قالاسى باس كونسۋلى جاڭ ۋي جانە ت. ب. كوپتەگەن دەلەگاتسيالار قاتىسۋدا.
اۆتور: الماس مۇقاش ۇلى
