ءبىر ءۇيدىڭ ەكى بالاسىن كولىكپەن قاعىپ ولتىرگەن جۇرگىزۋشى بەس جىلعا سوتتالدى

شىمكەنت. قازاقپارات - وڭتۇستىك قازاقستان وبلىسىندا ءبىر ءۇيدىڭ ەكى بالاسىن قاعىپ، باقيلىق ەتكەن جۇرگىزۋشى بەس جىلعا سوتتالدى. الايدا ەكى جاسوسپىرىمنىڭ اتا- اناسى سوت شەشىمىمەن كەلىسپەي، وبلىستىق سوتقا شاعىمداندى، - دەپ حابارلايدى قازاقپارات ح ا ا ءتىلشىسى.

ەسكە سالايىق، قايعىلى وقيعا وتكەن جىلدىڭ قىركۇيەك ايىندا سارى اعاش اۋدانىنا قاراستى الپامىس باتىر اۋىلىندا بولعان ەدى. 13 جاستاعى ءمارزيا مەن ونىڭ التى جاسار ءىنىسى مەيرامبەكتى سول اۋىلدىڭ تۇرعىنى كولىكپەن قاعىپ كەتكەن. سالدارىنان ەكى بالا دا اۋىر جاراقاتتان جان ءتاسىلىم ەتتى. ال جول اپاتىن جاساعان جۇرگىزۋشى ۋاقىتشا تەرگەۋ اباقتىسىنا قامالعان بولاتىن. ءىستى قاراعان سارى اعاش اۋداندىق سوتى كىنالى جۇرگىزۋشىنى بەس جىلعا باس بوستاندىعىنان ايىردى. جازاسىن قونىس كولونياسىندا وتەۋى ءتيىس دەپ بەلگىلەدى. الايدا جابىرلەنۋشى جاق بۇل ۇكىممەن كەلىسپەي، وبلىستىق سوتتىڭ اپپەلياتسيالىق القاسىنا شاعىم تۇسىرگەن.

«ول بار بولعانى بەس جىلعا سوتتالدى، ال مەن ەكى بىردەي پەرزەنتىمنەن ايىرىلىپ وتىرمىن. مۇنداي شەشىممەن مەن مۇلدەم كەلىسپەيمىن، ونى تىم بولماعاندا ون جىلعا سوتتاۋ كەرەك. سول ءۇشىن ءبىز وبىستىق سوتقا قايتا شاعىم تۇسىردىك»، - دەيدى اشىنعان انا داريعا ورازوۆا.

بۇگىن وبلىستىق سوتتىڭ قىلمىستىق ىستەر جونىندەگى القاسىندا وسى ءىس بويىنشا العاشقى سوت وتىرىسى ءوتتى. ەندىگى كەزەكتە جابىرلەنۋشى جاققا اپپەلياتسيالىق القانىڭ قانداي ۇكىم شىعاراتىنىن كۇتۋدەن باسقا امال قالماي تۇر.

اۆتور: اينۇر اقبايەۆا