بەلارۋس حالقى «ارامتاماقتىق تۋرالى» زاڭعا قارسى ەرەۋىلدەر وتكىزۋدە

استانا. قازاقپارات - بەلارۋستىڭ بىرنەشە قالاسىندا ەل پرەزيدەنتىنىڭ «الەۋمەتتىك ماسىلدىقتىڭ الدىن الۋ تۋرالى» دەكرەتىنە قارسى سانكسيالانباعان ەرەۋىلدەر ءوتتى، دەپ حابارلايدى قازاقپارات لەنتا. ر ۋ- عا سىلتەمە جاساپ.

ەڭ ءىرى اكسيا گومەلادا بولدى، وعان ءبىر مىڭنان ءۇش مىڭ ادامعا دەيىن قاتىستى. سونداي- اق جۇزدەگەن ادام موگيلەۆ، برەست جانە ۆيتەبسك قالالارىنىڭ كوشەلەرىمەن ءجۇرىپ ءوتتى. نارازىلىق شارالارىنا بالالارىن جەتەكتەگەن وتباسىلار مەن زەينەتكەرلەر قاتىستى. جينالعان جۇرتتىڭ قولدارىندا وپپوزيتسيالىق پلاكاتتار بولعان جوق دەۋگە بولادى، ءبىراق ولاردىڭ دەنى «مەن ارامتاماق ەمەسپىن» دەگەن جازۋى بار قاعازداردى ۇستاي كەلگەن. 17 -اقپان كۇنى وسىنداي اكسيا بەلارۋس استاناسى مينسكىدە ءوتتى. وعان جەرگىلىكتى وپپوزيتسيا وكىلدەرى قاتىستى. بەلسەندىلەر دەكرەتتىڭ كۇشىن جويۋدى، كوممۋنالدىق قىزمەتتەر باعاسىن تومەندەتۋدى جانە «تازا» سايلاۋلاردى قايتارۋدى تالاپ ەتتى.

12 -اقپان كۇنى ەسكەرتپە- حابارلاندىرۋلار جىبەرىلگەن بەلارۋستىڭ 470 مىڭ ازاماتىنىڭ 46 مىڭى «ارامتاماق» سالىعىن تولەگەنى بەلگىلى بولدى. رەسەي ۆاليۋتاسىمەن ەسەپتەگەندە 431 ميلليون رۋبل جينالعان. دەكرەتكە بەلارۋس پرەزيدەنتى الەكساندر لۋكاشەنكو 2015 -جىلى قول قويعان بولاتىن. وعان سايكەس، ەڭبەككە قابىلەتتى، ءبىراق جۇمىس ىستەمەيتىن، سونداي-اق سوڭعى التى اي بويى سالىق تولەمەيتىن رەسپۋبليكا تۇرعىندارى جىل سايىن 250 دوللار كولەمىندە سالىق تولەۋى ءتيىس. ايتپەگەن جاعدايدا، ولار اكىمشىلىك جاۋاپكەرشىلىككە تارتىلادى.