قازا تاپقان اسكەريلەر تۋرالى بۇرىن تۇسىرىلگەن بەينەروليك تابىلدى
بەينەروليكتى ءوزىنىڭ پاراقشاسىندا ق ر قورعانىس مينيسترلىگىنىڭ بۇرىنعى باسپا ءسوز حاتشىسى جانار قولباچايەۆا جاريالادى.
اتالمىش روليك وسىدان ەكى جىل بۇرىن 2015 -جىلى ناۋرىز مەيرامى قارساڭىندا تۇسىرىلگەن. روليكتە اسكەري جىگىتتەر ات قۇلاعىندا ويناپ، بىلەكتىڭ كۇشىن كورسەتىپ قانا قويماي، ونەرلەرىن دە پاش ەتەدى.
«قورعانىس مينيسترلىگىندەگى قىزمەتىمنەن كەتكەنىمە كوپ بولسا دا، قايعىدان شەت قالىپ، قازا تاپقان جىگىتتەردىڭ تۋىستارى مەن جاقىندارى كوڭىل ايتپاي تۇرا المايمىن. بەكەم بولىڭىزدار. مۇنداي قايعى جەڭىل بولمايتىنى انىق. مەنىڭ ارىپتەستەرىمە جۋرناليستەردىڭ سۇراعىنا جاۋاپ بەرۋ قانداي قيىن ەكەنىن تۇسىنەمىن. سولاردىڭ قاتىسۋىمەن ناۋرىز مەيرامىنا ارناپ تۇسىرىلگەن روليكتى تاعى ءبىر كورسەتكىم كەلەدى. ءومىر سولاي، ولار ارامىزدا جوق، ءبىراق ءبىزدىڭ جۇرەگىمىزدە ماڭگى قالا بەرمەك. يماندى بولسىن!»، - دەپ جازدى ج. قولباچايەۆا.
ايتا كەتەيىك، بۇعان دەيىن جامبىل وبلىسى كوكساي شاتقالىندا ورىن العان قار كوشكىنىنە قاتىستى ق ر قورعانىس مينيسترلىگى رەسمي مالىمدەمە جاساعان ەدى. وندا: «جامبىل وبلىسىنداعى كوكساي شاتقالىندا ءوتىپ جاتقان 91678 اسكەري ءبولىمى اسكەري قىزمەتشىلەرىنىڭ جاۋىنگەرلىك دايىندىعى بويىنشا جوسپارلى ساباعى بارىسىندا كۇتپەگەن جەردەن قار كوشكىنى ورىن الدى»، - دەلىنگەن. ءسال كەيىنىرەك، ق ر ءى ءى م توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆ قار كوشكىنى استىنان 16 ادام قۇتقارىلىپ، 7 ادامنىڭ مۇردەسى تابىلعانىن مالىمدەگەن بولاتىن.
اۆتور: جاسۇلان جولدىبايەۆ
