قاڭعىباسقا اينالعان تانىمال چەمپيون اقىرى باسپانالى بولدى

استانا. قازاقپارات - تانىمال الماتىلىق قاڭعىباس- چەمپيون اقىرى وڭالتۋ ورتالىعىنان كەتەتىن بولدىم.

ماكسيم سىگانكوۆ سومكەسىن تاڭەرتەڭ دايارلاپ قويعان. ەندى مۇندا قايتىپ كەلمەسەم ەكەن دەپ وتىر، دەپ حابارلادى ك ت ك ارناسى.

«جۇمىس ىستەپ، ءومىرىمدى اق قاعازدان باستايمىن»، - دەيدى ماكسيم.

ول جۇمىس ورنى رەتىندە ءبىر جەردى كوزدەپ تۇرعانىن، الايدا تۇراقتى تۇردە ورنالاسپايىنشا جاريا ەتكىسى كەلمەيتىنىن ايتتى.

الەۋمەتتىك وڭالتۋ ورتالىعىنىڭ قىزمەتكەرلەرى ماكسيمدى قۇشاقتاپ، وعان اقىل-كەڭەستەرىن ايتىپ شىعارىپ سالدى. مۇنداعىلار ونى كەز كەلگەن ۋاقىتتا قۇشاق جايا قارسى الۋعا دايىن ەكەنىن جەتكىزدى. تەك قوناق رەتىندە. ەندى بۇرىنعى اتلەتتىڭ ءومىرى تۇبەگەيلى وزگەرمەك.

«ءبىزدىڭ ماكسيم تولىقتاي ايىعىپ شىقتى، وعان دوستارى كومەكتەستى. مىنە، يرينا جۇگىرىپ ءجۇر. بىزگە سىزدەردىڭ باعدارلامالارىڭىز كومەكتەستى. ءبىز 15 كۇننىڭ ىشىندە وعان كۋالىك جاساپ بەردىك، ال دوستارى وعان بارلىق ايىپپۇلدارىن تولەۋگە جاردەمدەستى. ەندى ول جۇمىسقا دا ورنالاسا الادى، ال ءبىز قۋانىشتىمىز»، - دەيدى الماتىداعى الەۋمەتتىك وڭالتۋ ورتالىعى ديرەكتورىنىڭ ورىنباسارى ءلاززات زاكىربايەۆا.

حالىقارالىق دەڭگەيدەگى سپورت شەبەرى يرينا برەيگينا ءوزىنىڭ دوسى ءارى ارىپتەسىنىڭ قاڭعىباسقا اينالعانىن ەستىگەن كەزدە وعان العاشقىلاردىڭ ءبىرى بولىپ كومەك كورسەتتى. ول سپورتشى تانيتىن جانداردىڭ بارلىعىنا دەرلىك حابارلاسىپ، ونىڭ اۋىر تاعدىرى تۋرالى باياندادى. ال تانىستارى ءوز كەزەگىندە بۇل جايتتان شەت قالعان جوق. ولار ارنايى قور قۇرىپ، ماكسيمگە ارناپ قارجى جيناپ قويدى. ءتىپتى، وعان باسپانا تاۋىپ بەردى.

ازىرگە بۇل ءبىر ءۇيدىڭ جالعا بەرىلىپ وتىرعان بولمەسى. ەسەسىنە تاۋ ەتەگىندە.

«ازعا قاناعات تۇتايىق. مەنىڭشە، ءبىزدىڭ حيكايامىز ءساتتى اياقتالدى. بىردەڭەگە بولسا دا قول جەتكىزدىك. ول امان- ساۋ، ءبىز وعان اۋرۋىنان ايىعىپ شىعىپ، ءوزىن قايتا ادام سەزىنۋىنە مۇمكىندىك بەردىك. ەندى ول العا قاراي قادام باسقىسى كەلىپ وتىر. بۇل سونشالىقتى قيىن جۇمىس بولعان جوق. وعان قاراجات جيناپ بەرگەن جاندارعا مىڭ العىس. سولاردىڭ ارقاسىندا ازىرگە جۇمىسسىز وتىرعان ماكسيمنىڭ شىعىندارىن وتەي الامىز»، - دەيدى يرينا برەيگينا.

سپورتتىق گيمناستيكادان ك س ر و- نىڭ ەكى دۇركىن چەمپيونى ماكسيم سىگانكوۆ تۋعان اپكەسى ونىڭ پاتەرىن يەمدەنىپ العاننان كەيىن ءۇيسىز قالدى. كەيىننەن سپورتشىنىڭ ۇرلىق جاساعانى جانە ءوزىن-ءوزى قورعاۋ ماقساتىندا ارەكەتىن اسىرا پايدالانعانى ءۇشىن سوتتالعانى بەلگىلى بولدى. الايدا بۇل پروبلەمالاردىڭ ءبارى ەندى وتكەننىڭ ەنشىسىندە دەيدى ماكسيمنىڭ ءوزى. كەشە ول جۇمىس ىزدەۋگە كىرىستى. ول بولاشاعىنىڭ جارقىن بولاتىنىنان ءۇمىتتى.