استانا سيركىندە «افريكا الىپتارى» اتتى كەرەمەت شوۋ وتەدى
شوۋ جەتىم بالالار مەن ونكولوگيالىق اۋرۋعا شالدىققان بالالارعا ارنالعان، دەپ حابارلايدى قالالىق اكىمدىكتىڭ باسپا ءسوز قىزمەتى. كورسەتىلىمگە اقكول، ساندىقتاۋ، ەسىل جانە ءۇرپى اۋىلدارىنداعى بالالار ءۇيىنىڭ تاربيەلەنۋشىلەرى، سونداي-اق، انا مەن بالا ۇلتتىق عىلىمي ورتالىقتىڭ بالالار ونكولوگياسى ءبولىمىنىڭ ەمدەلۋشىلەرى كەلەدى. كىشكەنتاي كورەرمەندەر شوۋدى تاماشالاپ قانا قويماي، سيرك ارتىستەرىنىڭ جۇمىسىمەن تانىسادى.
شوۋ «Bestforkids» قوعامدىق قورى بەلسەندىلەرىنىڭ كومەگىمەن وتەدى. «بالالار ءۇيىنىڭ بۇلدىرشىندەرىنە ارنالعان مۇنداي شارالار بالالارعا جاڭا ءبىلىم الىپ، تانىمىن جەتىلدىرۋىنە موتيۆاتسيا بەرەرى ءسوزسىز.
اتالمىش شارانى اتا- انا قامقورىنسىز ءوسىپ جاتقان بالاپانداردى ەرەسەك ومىرگە دايىنداۋ مەن بەيىمدەۋگە باعىتتالعان اكتسيا دەسەك تە بولادى، - دەيدى «BestforKids» ج ف پرەزيدەنتى سايا كاكىم.
ەستەرىڭىزگە سالا كەتسەك، جىرتقىش اڭداردىڭ قاتىسۋىمەن وتەتىن «افريكا الىپتارى» شوۋى 4 -اقپاننان باستاپ استانا تسيركىندە ونەر كورسەتۋدە. ۇيىمداستىرۋشىلاردىڭ پىكىرىنشە، باعدارلاماعا اكروباتتار، اۋە گيمناستتارى مەن كۇلكىلى سايقىمازاقتار كىرەدى.
سونىمەن قاتار، سۋماترالىق جولبارىستار، اق ارىستاندار، ارقانمەن جۇرەتىن لاق، مايمىلدار مەن كوڭىلدى يتتەر دە كوپشىلىكتى ءوز ونەرىمەن ءتانتى ەتپەك. ءمۇيىزتۇمسىق بوني مەن كەرىك باگيردىڭ سيرك باعدارلاماسىنىڭ جۇلدىزىنا اينالارى ءسوزسىز. مۇنداي ەكزوتيكالىق جانۋارلار استانالىق سيرك مانەجىنە سيرەك شىعادى.
