كوكشەتاۋدا وتاندىق ويجۇمباق - تانگرام ىسكە قوسىلدى

كوكشەتاۋ. قازاقپارات - كوكشەتاۋدا ونەرتاپقىشتار وتاندىق تانگرام ويىنىن ىسكە قوستى، دەپ حابارلايدى «قازاقپارات» ح ا ا ءتىلشىسى.

كونە شىعىس تەحنولوگياسى بويىنشا پىشىندەر ويجۇمباق - تانگرامنىڭ بالالارعا ارنالعان «7 بولشەك» موبيلدىك قوسىمشاسىن كوكشەتاۋلىق ونەرتاپقىشتار سامات بيعازى مەن ايگەرىم ساعىندىقوۆا ىسكە قوسىپ وتىر.

اۆتورلار بۇل قوسىمشانى ەكى جىل بويى جاساعان. 2014 -جىلى جوبانى قورعاعان بۇل ەكەۋىنە «دامۋ» كاسىپكەرلىكتى دامىتۋ قورى 800 مىڭ تەڭگە كولەمىندە مەملەكەتتىك گرانت بەرگەن. 2016 -جىلى قوسىمشا ىسكە قوسىلدى. مۇنداعى ويىنىڭ ءبىر ەرەكشەلىگى - ول قوسىمشانىڭ ديزاينى قازاقتىڭ ۇلتتىق ويۋ ورنەگىن قولدانا وتىرىپ، ەتنوستيلدە جاسالعانىندا بولىپ وتىر. «ماسەلەن، ويىنداعى جينالعان ۇپاي ادەتتەگىدەي جۇلدىزشامەن ەمەس، اسىقپەن بەلگىلەنەدى. اسىرەسە، تانىمدىق، بوياۋى، وزگەشەلىگى جاعىنان دەس بەرمەيدى»، - دەيدى سامات بيعازى. ول ءوزىنىڭ جوباسىن «قادام» دەپ اتايدى. نەگىزى «7 بولشەك» قوسىمشاسى بۇل ازىرگە ءبىرىنشى ويىن عانا. قۇراستىرۋشىلار الداعى ۋاقىتتا ويىننىڭ بارلىق سەرياسىن شىعارۋدى جوسپارلاپ وتىر.