ۋنيۆەرسيادا ءۇشىن سالىنعان پاتەرلەر الماتىدا كەزەكتە تۇرعاندارعا بەرىلەدى

استانا. قازاقپارات - ۋنيۆەرسيادا ويىندارى ءۇشىن سالىنعان اتلەتتەر اۋىلىنداعى پاتەرلەر الماتىدا تۇرعىن ءۇي كەزەگىندە تۇرعان ازاماتتارعا بەرىلەدى.

بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا الماتى قالاسىنىڭ اكىمى باۋىرجان بايبەك ءمالىم ەتتى، دەپ حابارلايدى قازاقپارات.

«اتلەتتەر اۋىلىنا قاتىستى مەملەكەت باسشىسىنىڭ تاپسىرماسىنا سايكەس، ءبىز باسپانا كەزەگىندە تۇرعاندار اراسىندا 1748 پاتەردى ءبولۋ جۇمىسىن باستادىق. بۇل الماتىداعى باسپاناعا كەزەكتە تۇرعانداردى 10 پايىزعا قىسقارتادى. بۇگىندە كەزەكتە شامامەن 17 مىڭ ادام تۇر. ءبىز بۇل ماسەلەنى ناۋرىز ايىنا دەيىن قىسقا مەرزىمدە اياقتاۋدى جوسپارلاپ وتىرمىز»، - دەدى ول.

بايبەكتىڭ ايتۋىنشا، اكىمدىك پەن «قازاقستاننىڭ يپوتەكالىق كومپانياسى» اراسىنداعى كەلىسىمگە سايكەس حالىقتىڭ از قامتىلعان ساناتىنان باسپانا كەزەگىندە تۇرعانداردىڭ ءتىزىمى جاسالعان.

«باسپانا 8 دەن 20  جىلعا دەيىنگى مەرزىمگە ساتىپ الۋ قۇقىعىمەن جالعا بەرىلەدى. ءبىر شارشى مەترىنىڭ جالداۋ قۇنى 1036 تەڭگەنى قۇرايدى. بۇگىنگى كۇنى قۇجاتتارىن تولىق كولەمدە ۇسىنعان پاتەرگە ۇمىتكەر 1300 ادامنىڭ 430 ى وزدەرىنىڭ تولەم قابىلەتتەرىن دالەلدەدى. وسى رەتتە باقىتجان ءابىر ۇلى (ۇكىمەت باسشىسى ساعىنتايەۆ - رەد)، ءسىزدىڭ كومەگىڭىز قاجەت. «بايتەرەك» حولدينگى مەن «قازاقستاننىڭ يپوتەكالىق كومپانياسىنا» كەزەكتە تۇرعانداردىڭ قۇجاتتارىن راسىمدەۋدى جەدەلدەتۋدى تاپسىرۋىڭىزدى وتىنەمىن»، - دەدى باۋىرجان بايبەك.

اۆتور: مارلان جيەمباي