پەرۋاشيەۆ: بيشىمبايەۆ ىسىنە سوڭعى نۇكتەنى سوت قويادى

استانا. قازاقپارات - ق ر پارلامەنتى ءماجىلىسىنىڭ دەپۋتاتى ازات پەرۋاشيەۆ سىبايلاس جەمقورلىق بويىنشا ايىپتالىپ وتىرعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ قىلمىستىق ىسىنە قاتىستى پىكىرىن ايتتى، دەپ حابارلايدى قازاقپارات.

«وسى جوبا بويىنشا ( قىزىلورداداعى شىنى زاۋىتى) ايتاتىن بولسام، بىرنەشە جىل بۇرىن مۇراتحان توقمادي باسشىلىق ەتىپ وتىرعان شىنى وندىرۋشىلەر قاۋىمداستىعى تاراپىنان دا قارسىلىق بولعان ەدى. ول سول كەزدە ينۆەستور رەتىندە تارتىلعان كومپانيا شىن مانىندە ءوزىنىڭ مىندەتىنە ساي ەمەستىگىن اتاپ وتكەن بولاتىن. كەيىننەن بانكروتقا ۇشىرادى، كەڭسەلەرىندە تەك قانا سەگىز ادام جۇمىس ىستەپ جۇرگەنى حابارلانعان. قازىر بۇل ماسەلە تولىق ەسىمدە ەمەس، ءبىراق ءتيىستى حاتتى جولداعان ەدىك»، - دەدى ا. پەرۋاشيەۆ.

«ەسكەرىلگەن شىعىستار سايكەس بولمادى، ياعني ولاردىڭ ەسەبى بويىنشا جوبا ەشقاشان دا تيىمدىلىك كورسەتپەيتىندىگى ايتىلدى. وسىنداي قارسىلىق بولدى، الايدا بۇل جوبانى قارجىلاندىرۋعا قادام جاسادى. سونىمەن قاتار قارجىلاندىرۋ قۇنى تومەن دەڭگەيدەگى وسى تەكتەس باسقا جوباعا توسقاۋىل جاسالدى»، - دەدى دەپۋتات.

ونىڭ پايىمىنشا، بۇل ماسەلەدە ءادىل ەمەس باسەكەلەستىككە جول بەرىلدى.

 «بيشىمبايەۆ مىرزانىڭ ناقتى ايىپتاۋعا قاتىستى وندا كىناسىزدىك پرەزۋمپتسياسىن ەسكەرۋ كەرەك. بۇل ايىپتاۋدى سىبايلاس جەمقورلىقپەن كۇرەس جونىندەگى وكىلەتتى ورگان جاسادى، ال سوڭعى نۇكتەنى سوت قويادى»، - دەپ ءتۇيدى پەرۋاشيەۆ.

 بۇدان بۇرىن حابارلانعانداي، قۋاندىق بيشىمبايەۆ زاۋىت قۇرىلىسى كەزىندە ميلليارد تەڭگە جىمقىرۋ قىلمىسىندا كۇدىككە ءىلىندى. تەرگەۋ امالدارى بارىسىندا ول «بايتەرەك ۇ ب ح» ا ق باسقارماسىنىڭ ءتوراعاسى بولعان كەزدە  قىزىلوردا قالاسىندا تاباق شىنى شىعاراتىن جانە وڭدەيتىن زاۋىتتى سالۋ كەزىندە  «Orda Glass»  ج ش س ۆەدومستۆولىق باعىنىستاعى كومپانيا مەن ونىڭ مەردىگەرلىك ۇيىمى «شىمكەنت حيم مونتاج» ج ش س ارقىلى 1 ميلليارد تەڭگەنى جىمقىرۋ قىلمىستىق سحەماسىن ۇيىمداستىرعان.

اۆتور: رۋسلان عابباسوۆ