تىكەلەي ەفيردە «قازاقستانعا تۇكىرگەنىم بار» دەگەن رەسەيلىك ءانشى حالىقتان كەشىرىم سۇرادى
ول Life تەلەارناسىندا تىكەلەي ەفيردە «قازاقستانعا تۇكىرگەنىم بار» دەپ قالعان. وسىدان سوڭ ءانشىنىڭ ينستاگرامداعى پاراقشاسىنا قارسى پىكىرلەر قارشا بوراعان.
«بۇكىل قازاقستاننىڭ ساعان تۇكىرگەنى بار»، «ەشقاشان قازاقستانعا كەلمە!» دەگەن سىندى پىكىر جازعان انشىگە الەۋمەتتىك جەلى قولدانۋشىلارى. سونداي-اق، تىڭدارماندار ءانشىنىڭ قازاقستاندا كونسەرتىن قويۋعا بايكوت جاريالاۋ تۋرالى ۇسىنىس جاساعان.
ايتا كەتەيىك، ولگا سەريابكينا مەن ەكاتەرينا كيشۋك Mortal Кombat ويىنىن ويناپ وتىرىپ، جەلى قولدانۋشىلارىنىڭ سۇراعىنا جاۋاپ بەرۋ كەرەك بولعان.
باعدارلاما جۇرگىزۋشىسى «قازاقستان...» دەپ باستالاتىن سۇراقتى قويا بەرگەندە، ءانشى «قازاقستان؟ قازاقستانعا تۇكىرگەنىم بار...» دەپ قويىپ قالعان. كەيىنىرەك ءانشى ءوز سوزىنە وكىنىپ، ينستاگرامداعى پاراقشاسىندا قازاقستاندىقتاردان كەشىرىم سۇرادى.
