قوجامجاروۆ سوڭعى كەزدە تانىمال ادامدارعا قاتىستى قوزعالعان ىستەرگە توقتالدى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى قايرات قوجامجاروۆ تۇڭعىشباي جامانقۇلوۆ پەن بيگەلدى عابدۋللينگە قاتىستى قىلمىستىق پروتسەستىڭ ءمان- جايىنا توقتالدى، دەپ حابارلايدى قازاقپارات.

 قىلمىستىق پروتسەستىڭ اشىقتىعى ماسەلەسىنە توقتالعان ول، «باستاپقى كەزەڭدە قوعام تۇسىنبەۋشىلىك جاعدايىندا بولادى، سەبەبى قىلمىستىق قۋدالاۋ سالاسىنىڭ نازارىنا نەگىزىنەن ەلىمىزدە تانىمال ادامدار ءتۇسىپ جاتادى. وسى ورايدا ءتۇرلى سالادا جۇمىس ىستەيتىن ازاماتتار كەزدەسەدى. ماسەلەن، شىعارماشىلىق سالاسى بويىنشا جامانقۇلوۆتى اتاپ وتۋگە بولادى. حالىق ءارتىسى، ەلدىڭ سۇيىكتى اكتەرى ايىپتالۋشى رولىندە بولادى دەپ كىم ويلاعان. بۇنداي جاعدايلاردا ءبىز ناقتى دالەلدەردى ۇسىنۋىمىز كەرەك»، - دەدى قوجامجاروۆ.

بۇدان بولەك اگەنتتىك باسشىسى Radiotochka.kz پورتالىنىڭ ديرەكتورى بيگەلدى عابدۋللينگە قاتىستى ىسكە توقتالىپ ءوتتى.

 «عابدۋللينگە قاتىستى قىلمىستىق پروتسەسس باستالعان كەزەڭ ەسىمدە. جۋرناليستەر ماعان دالەلدەردى ۇسىنۋ تۋرالى وتىنىشپەن جولىققان بولاتىن. سوت اشىق ءوتتى، ياعني ونىڭ مويىنداعانىن بارلىعى كوردى. بارلىق دالەلدەر، ونىڭ ىشىندە تەرگەۋدىڭ قۇپيا ءىس- قيمىلدارىنىڭ ناتيجەسى دە بارشا قوعامنىڭ نازارىنا ۇسىنىلدى. وندا ونىڭ تالاپ قويعان سوزدەرى تىكەلەي جاريا ەتىلدى»، - دەدى قوجامجاروۆ.

بۇدان بۇرىن حابارلانعانداي، 2 - قاراشادا ول قارجىنى جىمقىردى دەگەن كۇدىكپەن ۇستالدى. كەيىن «جامانقۇلوۆ ءوز كىناسىن مويىندادى» دەگەن اقپارات تارادى.

ەستەرىڭىزگە سالا كەتەيىك، وتكەن جىلدىڭ 16- قاراشاسىندا استانا قالاسى الماتى اۋداندىق №2 سوتىنىڭ سانكسياسىمەن بيگەلدى عابدۋللين تۇتقىنعا الىنعان بولاتىن. عابدۋللين «Central Asia Monitor» جانە «Radiotochka.kz»  بۇقارالىق اقپارات قۇرالدارىنىڭ پايداسىنا بيۋدجەتتىك قارجىنى الۋ ءۇشىن بوپسالاۋ ارەكەتىنە باردى دەپ ايىپتالعان ەدى. ول ءوز قۇزىرىنداعى بۇقارالىق اقپارات قۇرالدارىن پايدالانىپ، مەملەكەتتىك ورگان جەتەكشىلەرىنىڭ ىسكەرلىك ابىرويىنا نۇقسان كەلەتىن ماتەريالداردى جاريالاۋ ارقىلى ولارعا اقپاراتتىق شابۋىل جاساعان.

اۆتور: رۋسلان عابباسوۆ