قىسقى ۋنيۆەرسيادانىڭ جابىلۋ سالتاناتىن تىكەلەي ەفيردەن كورە الاسىز
وسىعان وراي قىسقى ۋنيۆەرسيادانىڭ سالتاناتتى جابىلۋ ءراسىمىن كەشكى ساعات 19:00 دە «حابار»، «قازاقستان» جانە «azsportK» تەلەارنالارى تىكەلەي ەفيردە كورسەتەدى.
ۋنيۆەرسيادا ويىندارىنىڭ جابىلۋ سالتاناتى «الماتى - ارەنا» ستاديونىندا 1,5 ساعاتقا سوزىلادى. كورەرمەندەر قىزىقتى وقيعالارعا تولى شوۋ-باعدارلامالاردى تاماشالايتىن بولادى. سونداي-اق، اتالمىش شاراعا قازاقستان ەستراداسىنىڭ جۇلدىزدارى قاتىسادى.
جابىلۋ سالتاناتىنداعى قىزىقتى ساتتەردىڭ ءبىرى - كەلەسى ۋنيۆەرسيادا ويىندارىنىڭ ەستافەتاسىن قابىلداپ الاتىن كراسنويارسك قالاسىنىڭ «ۆيزيتتىك كارتاسى» بولماق. وسى ەلەۋلى وقيعاعا بايلانىستى، شاراعا كراسنويارسك قالاسىنىڭ باسشىلىعى مەن شىعارماشىلىق توبىنان تۇراتىن دەلەگاتسيا قاتىسادى.
جابىلۋ سالتاناتىنىڭ شارىقتاۋ شەگى - FISU جالاۋىن كەلەسى فورۋم استاناسى - كراسنويارسك قالاسىنا بەرۋ ءساتى بولماق. كورىنىس جاستار ۇيىمشىلدىعى مەن قازاقستان حالقى بىرلىگىنىڭ جارقىن سيمۆولىنا اينالادى.
اۆتور: كۇنسۇلتان وتارباي
