ارال تەڭىزى جايىنداعى دەرەكتى فيلم تانىستىرىلدى

استانا. قازاقپارات - بۇگىن ەلوردادا تۇركى اكادەمياسى حالىقارالىق ۇيىمى تەك ورتالىق ازيا ەلدەرى ءۇشىن عانا ەمەس كۇللى ادامزاتتىڭ ەكولوگيالىق پروبلەماسىنا اينالعان ارال تەڭىزى تۋرالى «ارال تەڭىزى: وتكەنى، بۇگىنى جانە كەلەشەگى» اتتى دەرەكتى فيلمدى تانىستىردى، دەپ حابارلايدى قازاقپارات.

 

اكادەميانىڭ تاپسىرىسىمەن تۇسىرىلگەن فيلمدە ارالدى قۇتقارۋعا ارنالعان ناقتى قادامدار مەن ولاردىڭ ناتيجەلەرى، سولتۇستىك ارالدى قايتا قالپىنا كەلتىرۋدىڭ قازاقستاندىق مودەلى باياندالادى.

ادامزات تاعدىرىنا اينالعان ارال ماسەلەسىن شەشۋگە قاتىستى قازاقستاندىق، قىرعىزستاندىق، وزبەكستاندىق، رەسەيلىك جانە تاجىكستاندىق بىلىكتى ساراپشىلاردىڭ پىكىرلەرى مەن ۇسىنىستارى كەلتىرىلەدى.

دەرەكتى فيلمنىڭ تانىستىرىلىمى بارىسىندا قىرعىز رەسپۋبليكاسىنىڭ بۇرىنعى مەملەكەتتىك حاتشىسى، ماناس حالىقارالىق قىرعىز- تۇرىك ۋنيۆەرسيتەتىنىڭ پروفەسسورى وسموناكۋن يبرايموۆ وركەنيەتتى قوعامدى تولعاندىرعان ارال تاعدىرىنا قاتىستى ءوز ويىمەن ءبولىستى.

ايتا كەتەرلىگى، ارالعا بىرىككەن ۇلتتار ۇيىمى سىندى حالىقارالىق ىرگەلى ۇيىمداردىڭ نازارىن اۋدارتقان العاشقى رەسمي قادام - ق ر پرەزيدەنتى نۇرسۇلتان نازاربايەۆتىڭ ۇسىنىسىمەن ورتالىق ازيا باسشىلارىنىڭ 1993-جىلعى 26- ناۋرىزدا  قىزىلوردا قالاسىندا وتكەن ارال تەڭىزى ماسەلەلەرى جونىندەگى 1 كونفەرەنتسيادا جاسالعان كەلىسىم بولدى.

كەلىسىمدى ورىنداۋدىڭ شارتى ەسەبىندە حالىقارالىق ارال قورى قۇرىلدى. ال كەلىسىم اياسىندا «سىرداريا ارناسىن رەتتەۋ جانە ارال تەڭىزىن ساقتاۋ» باعدارلاماسى جۇزەگە اسىرىلىپ، ءبىرىنشى كەزەڭى ناتيجەلى بولدى. ماسەلەن، سولتۇستىك ارال ارناسىنداعى سۋ دەڭگەيى ەداۋىر كوتەرىلىپ، ايماقتاعى تىرشىلىك جاندانا باستادى. ەكولوگيالىق اپات جىلدارى ارال قالاسىنان 75 شاقىرىمعا الىستاعان تەڭىز بۇگىندە شاھاردان نە ءبارى 12 شاقىرىم قاشىقتىقتا تۋلاپ جاتىر.

اۆتور: مارلان جيەمباي