قىتايلىق ساراپشى قازاقستاننىڭ ءۇشىنشى جاڭعىرۋىن تالقىلادى
قازاقستان مەن قىتاي شەكتى ۋاقىتتارى بىردەي «Made in China-2025» پەن «Made in Kazakhstan» باعدارلامالارىن تۇيىندەستىرۋدەن ءوزارا ءتيىمدى پايدا الادى. مۇنداي پىكىردى قازاقپاراتتىڭ قىتايداعى ارناۋلى ءتىلشىسى سادىق اكەجانوۆقا قىتاي حالىقارالىق پروبلەمالار ينستيتۋتى ش ى ۇ، ەۋروپا جانە ورتالىق ازيانى زەرتتەۋ ورتالىعى ديرەكتورىنىڭ ورىنباسارى لي تسزىگو ءبىلدىردى.
«پرەزيدەنت نۇرسۇلتان نازاربايەۆ قازاقستان حالقىنا جولداۋىندا ءۇشىنشى جاڭعىرۋدىڭ نەگىزگى باعىتتارى رەتىندە 3D- پرينتينگ، ونلاين-ساۋدا، ۇتقىر بانكينگ، ساندىق سەرۆيس سىندى سالالاردى اتادى. مەنىڭ پايىمىمشا، بۇعان قوسا نەگىزگى مازمۇنى مەن باستى تارماقتارى اگروونەركاسىپ سەكتورىن قامتيتىن «جاڭعىرۋ 3.0» مەن «قازاقستاندا جاسالعان» باعدارلامالارى جاڭا كەلەشەگى زور باعىتتار بولا الادى. قازاقستان ول ءۇشىن قاجەتتى رەسۋرستارعا يە جانە استىق، ەت جانە باسقا دا اۋىل شارۋاشىلىعى ونىمدەرىن ءوندىرۋ ەسەبىنەن ءوزىنىڭ جاھاندىق باسەكەگە قابىلەتتىلىگىن ارتتىرۋعا مۇمكىنشىلىگى زور»، - دەدى لي تسزىگو.
ول قىتايلىق «Alibaba Group» ينتەرنەت-كومپانياسىنىڭ نەگىزىن قالاۋشى جانە وسى ۇيىمنىڭ ديرەكتورلار كەڭەسىنىڭ ءتوراعاسى دجەك مانىڭ قازاقستاندا بولعانىن، سونىمەن بىرگە 2016-جىلدىڭ قىركۇيەگىندە حانچجوۋدا قازاقستان پرەزيدەنتى نۇرسۇلتان نازاربايەۆپەن ونلاين-ساۋدا سالاسىنداعى ىنتىماقتاستىق پەرسپەكتيۆاسىن تالقىلانعاندىعىن ەسكە سالىپ ءوتتى. «قازاقستان تاۋەلسىزدىگىنىڭ 25 جىلدىعى مەن ەلدەرىمىزدىڭ اراسىنداعى ديپلوماتيالىق قارىم-قاتىناستىڭ ورناۋىنا 25 جىل تولۋىنا وراي ق ح ر- داعى ق ر ەلشىلىگى ۇيىمداستىرعان ديپلوماتيالىق قابىلداۋعا قاتىسقان قازاقستاندىق اۋىل شارۋاشىلىعى تاۋارلارىن وندىرۋشىلەر « Alibaba Group-پەن» ىنتىماقتاستىققا قىزىعۋشىلىق تانىتتى»، - دەدى ول.
ونىڭ ايتۋىنشا، بازالىق سالالاردى تەحنولوگيالىق جاراقتاندىرۋعا باعىتتالعان مىندەتتەر مەن ۋاقىتشا باعدارلار، شيكىزاتتىق ەمەس ەكسپورتتى ارتتىرۋ، سونىمەن بىرگە «Made in Kazakhstan» برەندىن دامىتۋ قىتايدىڭ دامۋ باعدارلاماسىمەن سايكەس. «قىتايدا «Made in Kazakhstan»، ال قازاقستاندا 2025-جىلعا دەيىنگى «Made in Kazakhstan» باعدارلاماسى جۇزەگە اسىرىلۋدا. ءبىز ولاردى تۇيىندەستىرۋ ارقىلى ءوزارا ءتيىمدى پايدا الا الامىز. الدىمىزدان ەلەكتروندى ساۋدا جاڭا ەنەرگەتيكالىق كوزدەرىن دامىتۋداعى ىنتىماقتاستىقتا زور كەلەشەك اشىلادى. قازىردىڭ وزىندە ەلدەرىمىزدىڭ اراسىندا وندىرىستىك قۋاتتار سالاسىنداعى ىنتىماقتاستىق باعدارلاماسى قارقىندى جۇزەگە اسىرىلۋدا»، - دەدى لي تسزىگو.
ايتا كەتەيىك، قىتاي حالىقارالىق پروبلەمالار ينستيتۋتى (China Institute of International Studies) 1956 -جىلى ق ح ر سىرتقى ىستەر مينيسترلىگى جانىنان قۇرىلعان جانە بۇل ەلدەگى حالىقارالىق پروبلەمالارمەن اينالىساتىن كونە عىلىمي ينستيتۋت سانالادى. قىتايدىڭ ۇزدىك «اقىل- وي ورتالىقتارى» رەيتينگىندە 5-، ال ازيانىڭ 25 جەتەكشى ساراپتامالىق ورتالىقتارى رەيتينگىندە 11-ورىندا تۇر.
اۆتور: مارلان جيەمباي
