ەشكىم ميىمەن ويلاعىسى كەلمەيدى - بەردىبەك ساپاربايەۆ
ەش يدەيا جوق، جوبالاۋشىلاردىڭ بىلىكتىلىگى جەتپەيدى. بۇگىن وبلىس اكىمى بەردىبەك ساپاربايەۆ مەكتەپ، امبۋلاتوريا، كلۋب قۇرىلىسى كەزىندە ەسكى ادىستەن ارىلا الماعان وبلىستىق قۇرىلىس جانە ساۋلەت باسقارماسىن سىنعا الدى، دەپ حابارلايدى قازاقپارات ءتىلشىسى.
بۇگىن اقتوبە وبلىستىق قۇرىلىس جانە ساۋلەت باسقارماسى ءبىلىم، دەنساۋلىق ساقتاۋ، مادەنيەت، سپورت نىساندارىنىڭ قۇرىلىسىمەن تانىستىردى. ءبارى ءبىرىڭعاي. كوبى قىزىل، سارى تۇسپەن بويالعان. جوبالاۋ جۇمىستارى ەسكى ادىسپەن جاسالعانىن كورگەن وبلىس اكىمى بەردىبەك ساپاربايەۆ قۇرىلىسشىلار مەن جوبالاۋشىلاردى يدەياسى از ەكەنىن ايتىپ، وي جەتپەسە ينتەرنەتتەن قاراۋدى ۇسىندى.
«مەديتسينالىق امبۋلاتوريانىڭ سىرت كەلبەتىن قارا. تاعى ءۇش ميلليون قوسىپ، جاقسى نىسان سالۋعا بولادى. مىناۋ نە، اۋىلداعى ساراي(مال قورا) سياقتى بىردەڭە. بىرەۋى قويما سياقتى. ماسەلەن، ەسەت باتىر اتىنداعى سپورتتا دارىندى بالالارعا ارنالعان سپور كەشەنىنىڭ قۇرىلىسى 370 ميلليون تەڭگەدەن اسادى. دۇرىستاپ جاساۋعا بولادى عوي. ۇيالمايسىڭدار ما، بۇكىل وبلىسقا كورسەتۋگە. مەنىڭشە، كولحوزدا مۇنان جاقسى جاساي الادى. اقىلىڭ مەن فانتازياڭ جوق پا؟ وسىدان 20-30 -جىل بۇرىن سالدى، مۇنداي نىسانداردى. سەن ولاردى جالعاستىرىپ وتىرسىڭ. سەندەر قۇرىلىسشىسىڭدار، ادامدار كەز كەلگەن نىساندى اتاۋىنسىز تانۋى ءتيىس. سولاي جاساۋ كەرەك. مادەنيەت ءۇيى ونەرگە، مەكتەپ، بالاباقشا بالالارعا قىزىقتى ەتىپ سالىنۋى كەرەك. ەشكىم باسىمەن ويلاعىسى كەلمەيدى. قانداي ادامسىڭدار؟»، - دەدى وبلىس اكىمى بەردىبەك ساپاربايەۆ.
جوبالاردى تانىستىرۋ كەزىندە قالا اكىمى ءىلياس يسپانوۆ استانادا قورعاپ، نۇكتەسى قويىلعان قالانىڭ باس جوسپارىنداعى اۋدان اتى دا بەردىبەك ساپاربايەۆقا ۇناماي قالدى. قازىرگى باتىس-2 اۋدانىن «اقتوبە سيتي» دەپ اتاپ، ءۇشىنشى ىقشاماۋداندى سالۋى ءتيىس بيلىك ويىن كۇرت وزگەرتتى. سونىمەن، باتىس-3 اۋدانى 100 مىڭ ادامعا شاقتالادى. جىل سايىن 33 ميلليارد تەڭگە سالىنىپ، ۇلتتىق قوردان 19 ميلليارد تەڭگەگە جۋىق قارجى بولىنەدى دەگەن جوسپار بار. رەسپۋبليكالىق بيۋدجەتتەن 5, جەرگىلىكتى قازىنادان 9,5 ميلليارد تەڭگە يگەرىلۋى مۇمكىن. ءسويتىپ، قالانىڭ ورتالىعىنا، اكىمشىلىك اۋدانعا اينالۋى ءتيىس.
اۆتور: التىناي ساعىندىقوۆا
