ترامپ پۋتيندى قورعاپ سويلەگەنى ءۇشىن سىنعا قالدى

اقتاۋ. قازاقپارات - ا ق ش- تا دەموكراتتار دا، رەسپۋبليكاشىلدار دا پرەزيدەنت دونالد ترامپتى تەلەارناعا بەرگەن سۇحباتىندا رەسەي پرەزيدەنتى ۆلاديمير ءپۋتيندى قورعاعان پىكىرى ءۇشىن سىناپ جاتىر.

ترامپ Fox News جۇرگىزۋشىسى بيلل ورايليگە بەرگەن سۇحباتى كەزىندە ونىڭ «پۋتيندى قۇرمەتتەيسىز بە؟»  دەگەن سۇراعىنا «قۇرمەتتەيمىن» دەپ جاۋاپ بەرگەن. ورەيلي سوسىن «ءبىراق ول كىسى ءولتىرۋشى عوي. پۋتين - قانىشەر» دەگەن. ءبىراق ترامپ وعان «كىسى ولتىرۋشىلەر كوپ. وندايلار بىزدە دە جەتكىلىكتى. ءبىزدىڭ ەلىمىز كىناسىز دەپ ويلايسىز با؟»  دەپ جاۋاپ بەرگەن.

سەناتتاعى رەسپۋبليكاشىلدار جەتەكشىسى ميتچ ماككوننەلل پرەزيدەنتتىڭ سوزىنە بايلانىستى «ورىستاردىڭ ءوزىن قالاي ۇستاۋىن ا ق ش- تىڭ ارەكەتىمەن سالىستىرۋعا بولمايدى. پۋتين- ك گ ب- نىڭ بۇرىنعى اگەنتى، باسكەسەر، كوپشىلىگى سايلاۋ دەپ سانايتىن جولمەن سايلانباعان پرەزيدەنت» دەدى ماككوننەلل CNN- گە.

نەبراسكا شتاتىنىڭ سەناتورى، ترامپتى ءجيى سىنايتىن بەن ساسسە دە ABC- گە بەرگەن سۇحباتىندا «ەركىندىكتى سۇيەتىن ۇلى ۇلتپەن، ا ق ش- پەن باسكەسەرلەردىڭ اراسىندا ەشقانداي مورالدىق تەڭدىك جوق». ا ق ش- تىڭ رەسەيدەگى بۇرىنعى ەلشىسى ءارى باراك وبامانىڭ كەڭەسشىسى مايكل ماكفول ترامپتىڭ ءسوزىن «جيىركەنىشتى» دەپ اتادى.

«ازاتتىق» جاڭالىقتارى