قازاقتىڭ ءۇش ارىسىن ايالاعان فاتيما

استانا. قازاقپارات - الماتىدا قازاقتىڭ بەلگىلى تۇلعالارى ءبىلال سۇلەيەۆ، ءىلياس جانسۇگىروۆ جانە مۇحتار اۋەزوۆپەن وتباسى قۇرعان فاتيما عابيتوۆا تۋرالى دەرەكتى فيلمنىڭ تۇساۋكەسەرى ءوتتى.

كارتينا فاتيما عابيتوۆانىڭ كۇندەلىكتەرىنەن جانە بالالارى مۇرات اۋەزوۆ، يلفا جانسۇگىروۆا- جاندوسوۆانىڭ ەستەلىكتەرى بويىنشا تۇسىرىلگەن. ءفيلمنىڭ رەجيسسەرى - «قازاق فيلمنىڭ» كينوستۋدياسىنىڭ جەتەكشىسى باحىت قايىربەكوۆ.

1903 -جىلى جەتىسۋدىڭ قاپالى قالاسىندا تاتار وتباسىندا دۇنيەگە كەلگەن فاتيما جاستايىنان اكەسىنەن ايىرىلىپ، اپكەسى ەكەۋىن اناسى تاربيەلەگەن. قالانىڭ كىشكەنتاي قىزى ەرتە ساۋاتىن اشىپ، تاتارشا، قازاقشا جانە ورىسشا جاقسى ءبىلىپ ءوسىپتى. 1914 -جىلى قاپالدا ءبىرىنشى دۇنيەجۇزىلىك سوعىسقا اتتانعانداردى جانە 1916 -جىلعى ۇلت- ازاتتىق كوتەرىلىستى دە كوزىمەن كورگەن. بويجەتكەن فاتيما جاس پەداگوگ، اعارتۋشى ءبىلال سۇلەيەۆپەن تانىسىپ، وتباسىن قۇرايدى. ومىرگە ءسابي دە اكەلگەن. ون جىلداي تاتۋ-ءتاتتى وتباسىنىڭ تاعدىرىنا 1930 -جىلعى ساياساتتىڭ سالقىنى تيەدى. كۇيەۋى سۇلەيەۆتى تۇتقىنداپ، ەكى جىل جازىقسىز تۇرمەدە وتىرعىزعان. بۇدان كەيىن ءبىلال اقتالىپ، ماسكەۋگە كەتكەن. ءبىراز ۋاقىت وتكەن سوڭ فاتيما بەلگىلى اقىن ءىلياس جانسۇگىروۆپەن كەزدەسىپ، وتباسىن قۇردى. 1933 -جىلى ءىلياس جانسۇگىروۆ ماكسيم گوركيمەن تانىسىپ، كەزدەستى. وسى ساپاردا فاتيما دا بىرگە بارعان. كارتينادا ءىلياستىڭ شىعارماشىلىعىنىڭ كەمەلدى جاعى دا كوبىرەك ايتىلادى. اقىننىڭ اتاقتى «قۇلاگەر» پوەماسىنىڭ دۇنيەگە كەلگەندىگى دە ءسوز بولادى. فاتيمانىڭ ىلياسپەن وتباسى قۇرعانى ۇزاققا بارماي، 1938 -جىلى اقىندى «حالىق جاۋى» دەپ تۇتقىنداپ، كەيىن اتۋ جازاسىن كەسكەن. فاتيما عابيتوۆا بۇدان كەيىن مۇحتار اۋەزوۆپەن تۇرمىس قۇرعان.

فيلمدە 1950 -جىلدارى جانسۇگىروۆ اقتالىپ، ونىڭ شىعارمالارى قايتادان جارىققا شىققانى تۋرالى اڭگىمەلەنەدى. سونداي-اق كارتينادا 1958 -جىلعى جازۋشىلار وداعىنداعى ايتۋلى جينالىستىڭ دا كورىنىستەرى كىرگەن. جالپى، فيلم فاتيما عابيتوۆانىڭ باسىنان وتكەن تالاي قيىندىقتار تۋرالى اڭگىمەلەيدى.

 

«ايقىن» گازەتى