كومەك قارجى جەرگىلىكتى ورگانداردىڭ «استاۋىنا» اينالعان - پرەزيدەنت

استانا. قازاقپارات - سۋبسيديا جەرگىلىكتى ورگانداردىڭ «استاۋىنا» اينالعان. بۇگىن ۇكىمەتتىڭ كەڭەيتىلگەن ماجىلىسىندە قازاقستان پرەزيدەنتى نۇرسۇلتان نازاربايەۆ وسىلاي ايتتى، دەپ حابارلايدى قازاقپارات.

 «سۋبسيديا ءبولۋ ءبىرىزدەندىرىلۋى ءتيىس. سىزدەر سۋبسيديانى قالاي پايدالاناتىندارىڭىزدى بىلمەيمىن. ءبىراق، ماعان سۋبسيديا جەرگىلىكتى ورگاندار مەن اتالعان اقشانى الاتىن كومپانيالار ءۇشىن «استاۋعا» اينالعانى تۋرالى مالىمەتتەر جەتۋدە. ءتيىمدى پايدالانىلمايدى. بۇل اقشانى كىم قاداعالايدى؟ مەملەكەتتىڭ اقشاسى. قوزى- كورپەش، مۇمكىن سەن ولاردىڭ قايدا كەتىپ جاتقانىن انىقتارسىڭ»، - دەدى ەلباسى ەسەپ كوميتەتىنىڭ ءتوراعاسى جاڭبىرشينگە.

«ءبىز قاراپ جاتىرمىز»، - دەدى ءوز كەزەگىندە ەسەپ كوميتەتىنىڭ ءتوراعاسى.

 وسى ورايدا نۇرسۇلتان نازاربايەۆ باس پروكۋراتۋرا مەن ەسەپ كوميتەتىنە سۋبسيدياعا بولىنگەن قارجىنىڭ قالاي كادەگە جاراتىلاتىندىعىن تىڭعىلىقتى تەكسەرۋدى تاپسىردى.

«مۇنىڭ بارلىعى دا سالانىڭ ءالى كۇنگە دەيىن ءتيىمسىز باسقارىلاتىندىعىن كورسەتەدى. اسقار مىرزاحمەتوۆكە جۇكتەلگەن تاپسىرمالاردى قامتاماسىز ەتۋدى، جاعدايدى تۇزەۋدى تاپسىرامىن. اگروونەركاسىپ كەشەنىن دامىتۋدىڭ نەگىزگى باعىتتارىن ءبىز بىرگە انىقتادىق. سولاي عوي. بەكىتتىك، ايتتىق. بۇعان قوسا، استىقتى ءۇش ءوڭىردىڭ اكىمدەرىمەن پروبلەمالى اگروحولدينگتەر بويىنشا كەلىسىلگەن شەشىمدى 1 - ناۋرىزعا دەيىن ازىرلەۋدى تاپسىرامىن. بۇل «قاز ەكسپو استىق» پەن «يۆولگاعا» قاتىستى. نە ىستەۋ كەرەك؟ قاراڭدار، شارا قولدانىڭدار»، - دەدى مەملەكەت باسشىسى.

اۆتور: مارلان جيەمباي