ەلباسى بيزنەسمەندەردى جاسىرىن بوپسالاپ جۇرگەن ورگانداردى تەكسەرۋدى تاپسىردى
«تەك سوڭعى ەكى جىلدا مەملەكەتتىك كىرىس ورگاندارىمەن 17 مىڭ قىلمىستىق ءىس قوزعالدى. 17 مىڭ ءىس قوزعادىڭىزدار، الايدا ونىڭ 9 مىڭى بويىنشا قىلمىستىق قۇرامنىڭ بولماۋىنا بايلانىستى ءوندىرىس توقتاتىلدى. ونى كىم ىستەدى؟»، - دەپ توقتالدى مەملەكەت باسشىسى نۇرسۇلتان نازاربايەۆ ۇكىمەتتىڭ كەڭەيتىلگەن وتىرىسى بارىسىندا.
ءوز كەزەگىندە ق ر قارجى ءمينيسترى باقىت سۇلتانوۆ وتكەن جىلى بۇل پروبلەما بويىنشا باس پروكۋراتۋرامەن تىڭعىلىقتى تالقىلاۋ جۇرگىزىلگەنىن اتاپ ءوتتى.
«قىلمىستىق ءىستىڭ جارتىسىنان كوبى، ياعني 9 مىڭى بەكەرگە قوزعالعان. ادامداردى ارى- بەرى كۇندە تەكسەرىپ، جاۋاپ الىپ، تەرگەۋ جۇرگىزىپ، مازاسىن الىپ، بەدەلىن ءتۇسىرىپ كەتتى»، - دەپ سىنادى ۆەدومستۆونى ق ر پرەزيدەنتى.
سونىمەن قاتار باس پروكۋرور جاقىپ اسانوۆ وتكەن جىلى ەكىنشى جارتىجىلدىققا قاراعاندا، ءبىرىنشى جارتىسىندا قىلمىستىق ىستەر 10 ەسە ارتىق قوزعالعانىن اتاپ ءوتتى.
«ءبىرىنشى جارتى جىلدا 6 مىڭ قىلمىستىق ءىس قوزعالدى، ال ەكىنشىسىندە 600 دەن كەمدەۋ. ءبىرىنشى مەن ەكىنشى جارتىجىلدىق اراسىندا ءبىز بۇل ماسەلەنى قاراستىردىق، وسى ورايدا شىنىمەن دە تەرىس ارەكەتتەر وتە كوپ بولعان. وسى ماسەلەدە قىلمىستىق پروتسەستىڭ بۇل بولىگىندە كەز كەلگەن كاسىپكەرگە قىلمىستىق ءىس قوزعاۋ ءۇشىن مۇمكىندىكتەر بولدى، ال قازىرگى كەزدە ونىڭ بارلىعىن سۇزگىدەن وتكىزگەندىكتەن، 10 ەسە كەمىدى»، - دەدى ج. اسانوۆ.
بۇل ەسەپتى تىڭداعاننان كەيىن ن. نازاربايەۆ قىلمىستىق ىستەر نەگىزسىز قوزعالعان جاعدايدا، ايىپتى قىزمەتكەرلەردى قۇقىق قورعاۋ ورگاندارىنان بوساتۋدى تالاپ ەتتى.
«بۇل بيزنەسمەندەردى بوپسالاۋدىڭ جاسىرىن ءتۇرى. ادامداردى قورقىتىپ، قىلمىستىق ءىس قوزعايدى. كەيىننەن ول (بيزنەسمەن) بارلىعىن ىستەۋگە دايىن بولادى. وسىنداي ارەكەتكە بارعان قۇقىق قورعاۋ نەمەسە سالىق ورگاندارىنىڭ قىزمەتكەرلەر جۇمىستان بوساتىلۋى ءتيىس. نە ءۇشىن 9 مىڭ ءىس بوسقا قوزعالعان. ەندى بۇل قىزمەتكەرلەر كىم ەكەنىن تەكسەر»، - دەدى ەلباسى باس پروكۋرورعا قاراتىپ ايتقان تاپسىرماسىندا.
اۆتور: رۋسلان عابباسوۆ
