نۇرسۇلتان نازاربايەۆ ۇلتتىق بانك باسشىسىنا: ەشكىمنەن قورىقپا

استانا. قازاقپارات - ۇلتتىق بانكتىڭ ىسىنە ارالاسۋ ەلدىڭ قارجىلىق جۇيەسى ىسىنە ارالاسۋ دەپ ساناپ، جازالاۋ كەرەك.

بۇل تۋرالى بۇگىن ۇكىمەتتىڭ كەڭەيتىلگەن ماجىلىسىندە ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات. «ۇلتتىق بانك وتكەن جىلعى وتە اۋىر كەزەڭدە ساۋاتتى جۇمىس ىستەدى دەپ سانايمىن. قازىر مەن زاڭنامالىق ادىسپەن بانك مۇمكىنشىلىكتەرىن كۇشەيتۋ تاپسىرماسىن بەردىم. مۇنداي قۇقىق بەرۋ قاجەت. ۇلتتىق بانكتىڭ ىسىنە ارالاسۋ، ەلدىڭ قارجىلىق جۇيەسى ىسىنە ارالاسۋ دەپ ساناپ، جازالاۋ كەرەك. ۇلتتىق بانك تارتىپكە كەلتىرە باستاسا، ۇلتتىق بانك ءتوراعاسىنا شابۋىلدىڭ دا كۇشەيە تۇسەتىندىگىن بايقاپ وتىرمىن. مەن ونى (ۇلتتىق بانك ءتوراعاسىن) 100 پايىز قولدايمىن»، - دەدى پرەزيدەنت.

ەلباسى ۇلتتىق بانككە مۇنداي قىسىمدى اكسيونەرلەر مەن دەمەۋشىلەر جاسايتىندىعىن اتاپ ءوتتى. «ەشكىمنەن قورىقپا. گازەتتەر مەن جۋرناليستەر ەمەس، ولاردىڭ قوجايىندارى كىنالى. تارتىپكە كەلتىرۋگە كەدەرگى كەلتىرەتىن قوجايىندارعا شارا قولدانامىز. بانكتەر ءالسىز. نەبارى 4 بانك قانا بانكتەردىڭ 80 پايىز اكتيۆتەرىن ۇستاپ وتىر. قالعان 26 سىندا 1 پايىز دا جوق. الەمدە داعدارىس ورىن العان كەزدە شەيل مەن بريتيش گاز سىندى ءىرى كومپانيالار بىرىكتى. بىرىكسىن نەمەسە اكسيونەرلەر بانكتى ساقتاپ قالعىسى كەلسە قارجى قۇيسىن. بانكتەردى ساقتاپ قالۋدىڭ باسقا جولى جوق»، - دەدى نازاربايەۆ.

اۆتور: مارلان جيەمباي