ەلباسىنىڭ توراعالىعىمەن ۇكىمەتتىڭ كەڭەيتىلگەن ءماجىلىسى وتۋدە
«الدىمەن وزىڭىزگە ۇكىمەتتىڭ كەڭەيتىلگەن ماجىلىسىنە قاتىسىپ وتىرعانىڭىز ءۇشىن العىس ايتۋعا جانە جۇمىسىمىزدى باستاۋعا رۇقسات ەتىڭىز. بيىلعى جىل باسى ەلىمىز ءۇشىن ەلەۋلى وقيعالارعا تولى بولدى: ب ۇ ۇ قاۋپىسىزدىك كەڭەسىنە مۇشە بولۋىمىز، ساياسي رەفورما، حالىققا جولداۋىڭىز، قاتىسۋشى ەلدەر بويىنشا رەكوردتىق كورسەتكىشكە جەتكەن الماتى ۋنيۆەرسياداسى. وسىنىڭ بارلىعى ەلدىڭ قوعامدىق- ساياسي ومىرىنە تىڭ سەرپىن اكەلەتىن تاريحي ءمانى زور وقيعالار. ءسىزدىڭ وسى اپتادا حالىققا ارناعان جولداۋىڭىز جاھاندىق باسەكەگە قابىلەتتى مەملەكەت قۇرۋ ءۇشىن ءوز دامۋ جولىن ايقىنداعان ەلىمىزدى ءۇشىنشى جاڭعىرتۋعا باستايتىن ستراتەگيالىق ماڭىزدى قۇجات»، - دەدى ماجىلىستە ءبىرىنشى بولىپ ءسوز سويلەگەن ق ر پرەمەر- ءمينيسترى باقىتجان ساعىنتايەۆ.
ونىڭ ايتۋىنشا، ۇكىمەت جولداۋدا ايتىلعان بارلىق تاپسىرمالاردى ىسكە اسىرۋ بويىنشا ءتيىستى جۇمىستاردى باستادى. ارنايى ۇكىمەت وتىرىسى وتكىزىلىپ، ەكونوميكالىق ءوسىمنىڭ جاڭا مودەلىن قۇرۋ ءۇشىن ناقتى ءىس جوسپارى ايقىندالدى.
سونداي-اق جولداۋداعى ءاربىر تاپسىرماعا ناقتى جاۋاپ بەرەتىن لاۋازىمدى تۇلعالار بەكىتىلدى. «ۇكىمەت ساياسي رەفورمانى ءسىزدىڭ تاپسىرماڭىزعا سايكەس ىسكە اسىرۋدى باستادى. وسىعان وراي مەملەكەتتىك بيلىك تارماقتارى اراسىندا وكىلەتتىكتى ءبولۋ بويىنشا ءتيىستى زاڭ جوباسى دايىندالىپ جاتىر. سونىمەن قاتار ەكسپو-2017 كورمەسىنە دە ازىرلىك جۇمىستارى اياقتالۋعا جاقىن. حالىققا جاساعان ۇندەۋلەرىڭىزدە بەرىلگەن تاپسىرمالارىڭىزدى بۇلجىتپاي ورىنداۋ جۇمىسىمىزدىڭ ەڭ باستى مىندەتى. ۇكىمەت ءسىزدىڭ سەنىمىڭىزدى جوعارى باعالايدى جانە ءسىزدىڭ الدىڭىزداعى ۇلكەن جاۋاپكەرشىلىكتى بارىنشا سەزىنەمىز»، - دەدى پرەمەر- مينيستر.
اۆتور: مارلان جيەمباي
