بۇل كۇنى بەيبىت كۇننىڭ باتىرى قۇماربەك جاكەتاي ۇلى دۇنيەگە كەلگەن
بۇل تۋرالى فەيسبۋكتەگى پاراقشاسىندا مارقۇمنىڭ ۇلى نۇربولات قۇماربەك ۇلى حابارلادى. «بۇگىن اقپاننىڭ 3 ى - اكەمنىڭ تۋعان كۇنى. مارقۇم اكەم ومىردە بولعاندا بۇگىن 51 جاسقا اياق باسار ەدى. جانىڭىز ءجانناتتا بولسىن، اكەشىم!» دەپ جازدى ول.
ەسكە سالساق، 4 -جەلتوقساندا كوكشەتاۋ تاس جولىندا جانتۇرشىگەرلىك اپاتتا ءۇش جاسار بالا قۇتقارىلدى. كۋاگەرلەر قۇماربەك جاكەتاي ۇلىنىڭ ساۋ-تامتىعى قالماعان كولىك ىشىنەن كىشكەنتاي بالانى امان الىپ شىققانىن ايتادى. ودان كەيىن ارتقى ورىندىقتا وتىرعان قىز بالانى قۇتقارۋعا ۇمتىلعان ول ارت جاقتان قاتتى جىلدامدىقپەن كەلىپ سوعىلعان اۆتوبۋستىڭ استىندا قالعان. الەۋمەتتىك جەلىلەردە قازاقستان حالقى مارقۇمنىڭ وتباسىنا كومەك كورسەتۋ اكسياسىن ۇيىمداستىردى.
ودان بولەك، «حالىقتىڭ سۇيىكتىسى - نارودنىي ليۋبيمەتس گودا» قوعامدىق سىيلىعىنىڭ ۇيىمداستىرۋشىلارى مەن ءادىلقازىلارى «باتىل جۇرەك» قۇرمەتتى سىيلىعىن ەرەن ەرلىگى ءۇشىن قۇماربەك جاكەتاي ۇلىنا بەرۋدى دۇرىس دەپ شەشىپ، بيىل 14 -قاڭتار كۇنى سىيلىقتى ونىڭ ۇلى نۇربولاتقا تابىستادى.
قۇماربەك جاكەتاي ۇلى بۋراباي اۋدانى جاڭاجول اۋىلىنىڭ تۇرعىنى. 1991 -جىلى موڭعوليادان اتامەكەنگە ورالعان. ارتىندا ءۇش بالاسى، جارى قالدى. ول ءومىرىنىڭ سوڭعى ساتىندە قارشاداي بالانى امان الىپ الۋعا كومەكتەسىپ، ورىمدەي جاس قىزدى قۇتقارىپ قالدى. ەكى جاستىڭ ءومىرى ءۇشىن ءوز جانىن پيدا ەتتى.
اۆتور: ەربول جانات
