ۋنيۆەرسيادا ويىندارىنا بيلەت تابا الماعان جانكۇيەر مالىمدەمە جاسادى
1- اقپان كۇنى الەۋمەتتىك جەلىدە قازاقستاندىق جانكۇيەر دانيل راميننىڭ سىني پىكىردەگى ۆيدەوسى جاريالانعان بولاتىن.
ول «حالىق ارەنا» مۇز ايدىنى كەشەنى كاسساسىنان حوككەي ماتچتارىنا بيلەتتىڭ بولماۋىنا نارازىلىق تانىتقان ەدى. قازىرگى ۋاقىتتا ويىن وتەتىن ارەنالارداعى كورەرمەنگە ارنالعان ورىنداردىڭ ءبىر بولىگى حالىقارالىق ستۋدەنتتىك سپورت فەدەراتسياسى وكىلدەرى ءۇشىن ساقتالىپ تۇراتىندىقتان بيلەتتەردىڭ جەتىسپەي قالعاندىعى انىقتالدى.
ال دەلەگاتتاردىڭ ءار ۋاقىتتا دا جارىستى تاماشالاۋعا ۋاقىتتارى بولا بەرمەيدى. سول سەبەپتى كورەرمەن ارەناداعى بوس قالعان ورىنداردى بايقايدى. جانكۇيەردىڭ جانايقايى قۇلاقتارىنا جەتكەن ۋنيۆەرسيادا-2017 ديرەكسياسىنىڭ جانە حالىقارالىق ستۋدەنتتىك سپورت فەدەراتسياسىنىڭ وكىلدەرى وزدەرىنە تيەسىلى بيلەتتەردىڭ باسىم بولىگىنەن جانكۇيەرلەر ءۇشىن باس تارتۋ تۋرالى شەشىم قابىلدادى.
«مۇنداي ارەكەتتىڭ ورىن الۋى دۇرىس. مەن مۇنى جىلى قابىلدادىم. ءبىزدى ەستيتىندىكتەرى قۋانتادى. ۋنيۆەرسيادا ديرەكتسياسى بارلىعىن تۇزەتەتىن بولدى جانە FISU ءوز بيلەتتەرىنەن جانكۇيەرلەر ءۇشىن باس تارتتى. مەنىڭشە، احۋال تۇزەلىپ، ادامدار جارىستاردى تاماشالاي الاتىن بولادى»، - دەدى دانيل رامين.
سونىمەن قاتار ول الماتىدا ءوتىپ جاتقان ۋنيۆەرسيادا قازاقستاندىقتاردىڭ ومىرىندەگى ماڭىزدى وقيعالاردىڭ ءبىرى ەكەندىگىن باسا ايتتى. «وزىمدە سپورتشىمىن، وتباسىمدا دا سپورتشىلار بار. ۋنيۆەرسيادا بۇل قازاقستان ءۇشىن ۇلكەن وقيعا. مەن سپورتشىلارىمىزعا قولداۋ بولعانىن قالايمىن. بۇل وتە ماڭىزدى»، - دەدى ول.
اۆتور: مارلان جيەمباي
