استانا اكىمدىگى اۆتوبۋس جۇرگىزۋشىلەرىن ادەپتى سويلەۋگە ۇيرەتەدى

استانا. قازاقپارات - استانا اكىمدىگى اۆتوبۋس جۇرگىزۋشىلەرىن ەلوردا تۇرعىندارىن تاسىمالداعاندا مادەنيەتتى بولۋعا ۇيرەتەدى.

بۇل تۋرالى استانا اكىمى اسەت يسەكەشەۆ Facebook الەۋمەتتىك جەلىسىندە جازدى، دەپ حابارلايدى «قازاقپارات» ح ا ا ءتىلشىسى. «اۆتوبۋس جۇرگىزۋشىلەرى مادەنيەتتىلىك دەڭگەيىن كوتەرمەيىنشە، جۇمىستان شىعارامىز، جازالايمىز، ۇيرەتەمىز»، - دەپ جازدى يسەكەشەۆ.

ەسكە سالا كەتەيىك، 1 -اقپان كۇنى ساعات 18:00 كەزىندە «كوكتەم» ساۋدا ءۇيى ايالداماسىندا ۋاقىت ارالىعىنا بايلانىستى № 120 جانە № 39 -اۆتوبۋستارى جۇرگىزۋشىلەرى اراسىندا جانجال ورىن العان. № 39 -باعداردىڭ جۇرگىزۋشىسى ايالدامادان قوزعالا وتىرىپ، قيىلىسقا قاراي جۇرە باستاعان كەزدە №120 -قوعامدىق كولىگىن باسقارىپ وتىرعان ازامات قوزعالىسقا كەدەرگى جاساۋعا تىرىسقان. وسى وقيعاعا بايلانىستى قىزمەتتىك تەكسەرۋ جۇرگىزىلىپ، اۆتوبۋس جۇرگىزۋشىلەرىنەن تۇسىنىكتەمە الىنعان.

اتاپ ايتقاندا، قوس تاراپتىڭ دا جول ەرەجەسىن بۇزعاندىعى انىقتالدى. №39 -باعداردىڭ جۇرگىزۋشىسىنە قاتاڭ سوگىس جاريالانسا، №120 -اۆتوبۋستىڭ جۇرگىزۋشىسىنە قاتىستى جۇمىسقا قايتا تۇرۋ قۇقىعىنان ايىرىپ، ەڭبەك كەلىسىمشارتى توقتاتىلدى.