ەلىمىزگە ءۇش ءتىلدى مەڭگەرگەن كادرلار قاجەت - عالىم
بۇل تۋرالى «قازاقپارات» ح ا ا تىلشىسىنە ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ فيلولوگيا جانە پەداگوگيكا فاكۋلتەتىنىڭ دەكانى راۋشان امىرەنوۆا ايتتى.
ونىڭ سوزىنشە، ەلباسىنىڭ باسەكەگە قابىلەتتى 30 ەلدىڭ قاتارىنا قوسىلۋ ماقساتىندا جۇرگىزىپ وتىرعان ساياساتى اياسىندا «ءۇش تۇعىرلى ءتىل» - ەلدىڭ ەرتەڭى ءۇشىن قاجەت ماسەلە.
«ءۇش تۇعىرلى ءتىل» ساياساتىنىڭ ناتيجەسى رەتىندە جوعارى وقۋ ورىندارىندا ءۇش ءتىلدى مەڭگەرىپ، ءبىلىم الىپ جاتقان «بولاشاق» باعدارلاماسىنىڭ ماماندارىن اتاپ وتۋگە بولادى. العاشقى ىلكى جوبا رەتىندە 2012 -جىلدان باستاپ ءبىزدىڭ ۋنيۆەرسيتەت تاراپىنان كوپ ءتىلدى مۇعالىم مامانداردى دايارلاۋ ءىسى قولعا الىندى. كەيىن بۇل جوبا 2014 -جىلى ماگيستراتۋرادا دا ىسكە اسىرىلا باستادى. قازىر 17 ماماندىق بويىنشا كوپ تىلدە ءبىلىم بەرۋ باعدارلاماسى بويىنشا ساباق جۇرگىزىلەدى. سوڭعى بەس جىل ىشىندە وسى باعدارلاما بويىنشا جۇمىس ىستەيتىن 60-تان استام وقىتۋشىمىز ا ق ش، ۇلى بريتانيا، پولشا، ەستونيا، كيپر، پورتۋگاليا، يسپانيا، گەرمانيا سياقتى ەلدەردەگى الدىڭعى قاتارلى جوعارى وقۋ ورىندارىندا تاعىلىمدامادان ءوتىپ كەلدى، - دەدى راۋشان امىرەنوۆا.
سونىمەن قاتار، ول مەملەكەت باسشىسى نۇرسۇلتان نازاربايەۆتىڭ قولعا الىپ وتىرعان سارابدال ساياساتى مەن باسەكەلەستىككە قارسى تۇرا الاتىن ەلىمىزدىڭ مىقتى ەكونوميكاسىنىڭ ارقاسىندا قازاقستان دامۋدىڭ بارلىق ساتىسىنان مۇدىرمەي ءوتىپ، دامىعان 30 ەلدىڭ قاتارىنا قوسىلاتىنىنا سەنىم ارتىپ وتىر.
اۆتور: اسلان وسپانوۆ
