قازاقستانداعى ەڭ ارزان اسحانا - استانادا

استانا. قازاقپارات - استاناداعى ساكەن سەيفۋللين اتىنداعى اگروتەحنيكالىق ۋنيۆەرسيتەتىنىڭ اسحاناسىن ەلوردادا عانا ەمەس، جالپى قازاقستان بويىنشا ەڭ ارزان ءارى قولجەتىمدى قوعامدىق تاماقتانۋ ورنى دەپ اتاۋعا بولادى.

وسىلايشا، ۋنيۆەرسيتەت باسشىلىعى ستۋدەنت جاستاردىڭ تاماعىن توق قىلىپ، الاڭسىز ءبىلىم الۋلارىنا جاعداي جاساپ وتىر. قازاقپارات ءتىلشىسى قولجەتىمدى استىڭ ساپاسى مەن باعاسىن كورىپ، تاماقتى ەكى، ءتىپتى ءۇش ەسە ارزان ساتۋدىڭ سىرىن بىلگەن بولاتىن. ۋنيۆەرسيتەتتە وتكەن رەسمي شاراعا بارعاندا ونداعى اسحانادا تاماقتىڭ ءبىرشاما ارزان ەكەنىن بىلمەگەن ەدىك. باستاپقىدا قاتارداعى اسحانالاردان ەشبىر ايىرماشىلىعى جوق سەكىلدى كورىنگەن.

الايدا سورەلەردە ءتىزىلىپ تۇرعان توقاش، كەكس جانە تاعى باسقا جەڭىل- جەلپى نان ونىمدەرىنىڭ باعاسىن كورگەندە كوزىمىزدى ءبىر ۋقالاپ الدىق. ال ءبىر ليمون قوسىلعان شاي مەن پيسسانى العاندا ودان دا قاتتى تاڭ قالدىق. «سىزدەن 95 تەڭگە»، - دەدى كاسسير قىز. شىداي الماي، ىستىق تاعامداردىڭ پرايسىنا ۇڭىلدىك. بورش، ساڭىراۋقۇلاق سورپاسى، قىشقىلتىم كوجە، ءۇي كەسپەسى، اشى كوجە، اس بۇرشاق سورپاسى ءبارى - 85 تەڭگە، ەكىنشىگە گارنيرى بار كوتلەت، قۋىرداق، لاگمان، گارنيرى بار بيفشتەكس، تەفتەل، تاۋىق ەتى گارنيرىمەن، گۋلياش، تۇشپارا، فرانتسۋزشا، ارميانشا، ءتىپتى «پەكينشە» جاسالعان ەت. بارلىعى 165 تەڭگەدەن.

ىڭعايى كەلىپ تۇرعاننان سوڭ ۋنيۆەرسيتەت باسشىلىعىنا جولىعىپ، اسحانا تاعامدارىن ءدامدى ءارى ارزان ەتۋدىڭ سەبەبىن بىلگەندى ءجون كوردىك. «الدىمەن ستۋدەنتتەردىڭ دەنساۋلىعىن ويلاۋ كەرەك قوي. سول سەبەپتى ءبىز وقۋ عيماراتتارىنىڭ ىشىندە، سوسىن ءاربىر جاتاقحانادا وسىنداي اسحانالاردى اشتىق. ال تاماقتىڭ باعاسى نەگە ارزان؟ بىرىنشىدەن، اسحاناعا قاجەتتى بولمەلەردى جالعا الۋ قۇنىن قاتتى كوتەرگەن جوقپىز. ودان پايدا تاپقىمىز دا كەلمەيدى. باستىسى - سۋ، جارىق، جىلۋ جانە تاعى باسقا كوممۋنالدىق شىعىنداردى وتەپ وتىرسا بولعانى. جالعا الۋشىعا ءبىر عانا شارت قويدىق، ول تاماقتىڭ باعاسى ارزان بولۋى كەرەك. ارينە، تاماقتىڭ ساپاسى دا باقىلانادى. ونى ستۋدەنتتەر وزدەرى تەكسەرەدى. سولاردىڭ باستاماسىمەن قۇرىلعان كوميسسيالار بار. اسحانالاردى جاسىرىن تۇردە ارالاپ، ءاربىر تاعامنىڭ ساپاسىن، ءتىپتى سالماعىن تەكسەرىپ وتىرادى. ولار قايدا بارادى جانە قاشان كەلەدى، ونى ەشكىم بىلمەيدى. ەگەر تاماقتىڭ ساپاسى تومەندەسە، جالعا الۋشىلاردى اۋىستىرۋ تۋرالى ۇسىنىستار جاسالادى»، - دەيدى ۋنيۆەرسيتەتتىڭ ءبىرىنشى پرورەكتورى ايتجان ءابدىروۆ.

ونىڭ ايتۋىنشا، بۇگىندە ۋنيۆەرسيتەت جانىنان كوكونىس ءوسىرۋ دە قولعا الىنعان. سونى ارزان باعامەن اسحانالارعا جەتكىزۋدىڭ ارقاسىندا تاماقتىڭ باعاسىن تاعى تومەندەتۋگە مۇمكىندىك بار. بۇدان بولەك، بۇل جەردە ستۋدەنتتىك دۇكەن مەن ءدارىحانا جۇمىس ىستەيدى. وندا دا تاۋاردىڭ باعاسى نارىقتان 20 پايىزعا دەيىن ارزان.

«ءيا، تاماق جاعىنان بىزگە وتە ىڭعايلى. استاناداعى باسقا ۋنيۆەرسيتەتتەردە وقىپ جاتقان قۇربى- قۇرداستارىمىز سياقتى اقشانى ۇنەمدەپ، دالادان نان، مايونەز، «بيچ- پاكەت» الىپ جۇرمەيمىز. ساباق كەزىندە دە، ساباقتان كەيىن دە اسحاناعا بارىپ، تاماق ىشەمىز دە، كىتاپحاناعا، يا بولماسا، باسقا دا قوعامدىق جۇمىستارمەن اينالىسۋعا كىرىسەمىز. ۇلكەندەر ستۋدەنتتىك كەزدە اسقازاندى قۇرتىپ الدىق دەپ ءجيى ايتادى. بىزگە ونداي قاۋىپ ءتونىپ تۇرعان جوق شىعار»، - دەيدى ۋنيۆەرسيتەت ستۋدەنتتەرى.

اۆتور: ارمان اسقاروۆ