ۋكراين جىگىتى: انام قازاق ءتىلىن ۇيرەنسەڭ، بولاشاعىڭ بولادى دەدى - كەسكىن
وبلىستاعى فەدوروۆ اۋدانى جايلى مالىمەت جيناپ جۇرگەن بلوگەردىڭ ايتۋىنشا، دميتريي روماشەنكو قازاقتار از قونىستانعان اۋىلدا قازاق ءتىلىن مەڭگەرىپ، قوستانايداعى ۋنيۆەرسيتەتتە «قازاق فيلولوگياسى» ماماندىعى بويىنشا ءبىلىم العان. جاريالانعان ۆيدەوسۇحباتتا روماشەنكو ءوزى جايلى ايتىپ بەرەدى.
«فەدوروۆ اۋىلىندا قاراپايىم ۋكراين وتباسىندا دۇنيەگە كەلدىم. وسى ديميتروۆ اتىنداعى ورتا مەكتەبىن 2011 -جىلى ءبىتىردىم. ۇ ب ت- نى تاپسىرىپ، قوستاناي مەملەكەتتىك ۋنيۆەرسيتەتىنىڭ «قازاق فيلولوگياسى» دەگەن فاكۋلتەتىنە وقۋعا ءتۇستىم»، - دەپ اڭگىمەلەيدى دميتري.
كەيىن ول 2015 -جىلى وقۋدى ءتامامداپ، سودان بەرى تۋعان اۋىلىنداعى مەكتەپتە قازاق ءتىلى ءپانىنىڭ مۇعالىمى بولىپ جۇمىس ىستەپ كەلەدى ەكەن.
سۇحباتىندا ول قازاق ءتىلىن قالاي مەڭگەرگەنى جايىندا ايتتى. «ءبىزدىڭ ورتامىزدا قازاقشا سويلەيتىن ادامدار وتە از. قازاقتاردىڭ دا ىشىندە از. ءبىراق ءبىزدىڭ وبلىسىمىزدا ءقازىر وزگە ۇلت وكىلدەرىنە ارنالعان «ءتىل دارىن» دەگەن كلۋب جۇمىس ىستەيدى. سول كلۋبتا ءارتۇرلى ۇلت وكىلدەرى قازاقشا سويلەيدى. ال «قازاق ءتىلىن قالاي مەڭگەردىڭ؟» دەگەن سۇراققا ەڭ ءبىرىنشى جاۋابىم - ءبارى دە ادامنىڭ قالاۋى بويىنشا. مەندە قانداي ماماندىق تاڭدايمىن دەگەن سۇراق بولدى. سول كەزدە اكە- شەشەممەن وتىرىپ، وسى ماسەلەنى تالقىلادىق. انام سول كەزدە «ءيا، قازاق ءتىلى ءپانى مۇعالىمىنە باراسىڭ، بولاشاعىڭ بولادى» دەدى. سول سەبەپتى وسى ماماندىقتى تاڭدادىم»، - دەدى ول.
ايتۋىنشا، ول ۋنيۆەرسيتەتتە دە قازاق تىلىندە ءبىلىم العان. «وكىنىشكە قاراي، ورىسشا سويلەيتىندەرگە «قازاق فيلولوگياسى» دەگەن ماماندىق جوق. مەنىڭشە بولۋى كەرەك. ويتكەنى ماتەريالدى وزگە ۇلت وكىلدەرىنە باسقاشا وقىتۋ كەرەك. ءبىراق مەن وقىدىم»، - دەدى ۋكراين جىگىتى.
مۇنىمەن قاتار، ول وقۋشىلارىنىڭ، اسىرەسە باستاۋىش سىنىپ وقۋشىلارىنىڭ قازاقشا جاقسى سويلەي الاتىنىن ايتادى. «مەندە جاڭا باعدارلاما بويىنشا ءبىرىنشى سىنىپتار، ەكىنشى سىنىپتار ەسكى باعدارلاما بويىنشا جانە توعىزىنشى سىنىپتار ءبىلىم الادى. ءبىرىنشى سىنىپتارداعى وقۋشىلار ءتىلدى جاقسى مەڭگەرىپ كەلەدى. ويتكەنى ولار مەنىڭ باعىتىم بويىنشا، ادىستەمەم بويىنشا جۇمىس جاساي الادى. سەبەبى مەنىڭ باستى ادىستەمەم - سوزدەردى جاتتاۋ. كۇن سايىن جاڭا سوزدەرمەن كوپ جۇمىس جاسايمىز. گرامماتيكانى بولەك قاراستىرامىز، ال بالالاردىڭ سوزدىك قورلارىن دامىتۋ كەرەك، ونىڭ سويلەۋ تىلدەرىن دامىتۋ كەرەك»، - دەدى ول.
سونىمەن قاتار، ياكوۆ فەدوروۆتىڭ Youtube حوستينگىندەگى ارناسىندا دميتري روماشەنكونىڭ ساباق وتكىزىپ جاتقانى تۇسىرىلگەن ۆيدەو پايدا بولدى. وندا ول وقۋشىلاردان ابايدىڭ قارا سوزدەرى جايلى سۇرايدى.
kaz.tengrinews.kz
