تولاسسىز جاۋعان قارعا بايلانىستى «شىمبۇلاقتاعى» تاۋ شاڭعى سايىستارى توقتاتىلدى

الماتى. قازاقپارات - الماتىدا ءوتىپ جاتقان ۋنيۆەرسيادانىڭ ۇيىمداستىرۋشىلارى تولاسسىز جاۋىپ جاتقان قارعا بايلانىستى «شىمبۇلاقتا» وتەتىن تاۋ شاڭعى سايىستارىنىڭ ۋاقىتى وزگەرتىلگەنىن حابارلادى،

 دەپ جازادى قازاقپارات ءتىلشىسى.

«31 - قاڭتاردا، ساعات 10:00-دەگى قىزدار اراسىنداعى تاۋ شاڭعى سايىستارىنىڭ ۋاقىتىن تولاسسىز جاۋىپ جاتقان قارعا بايلانىستى وزگەرتۋ تۋرالى شەشىم قابىلداندى. وزگەرگەن ۋاقىتى تۋرالى قوسىمشا حابارلانادى»، دەلىنگەن حابارلامادا.

ەسكەرتە كەتەيىك، الماتى قالاسىنىڭ توتەنشە جاعدايلار دەپارتامەنتى «قازگيدرومەت» ر م ك- عا سىلتەمە جاساي وتىرىپ، ىلە الاتاۋىندا قاتتى جاۋىن- شاشىننىڭ (قار ارالاس جاڭبىر) اسەرىنەن جانە قار جامىلعىسىنىڭ بيىك بولۋىنا بايلانىستى 31 - قاڭتار، 1 - اقپان ارالىعىندا قار كوشكىنى ءجۇرۋى ىقتيمال ەكەنىن ەسكەرتكەن.

 «الماتى قالاسىنىڭ توتەنشە جاعدايلار دەپارتامەنتى «قازگيدرومەت» ر م ك فيليالىنىڭ 2017 -جىلعى 31 - قاڭتارداعى № 7 داۋىلدى الدىن الا ەسكەرتۋىن نەگىزگە الا وتىرىپ، ىلە الاتاۋىندا قاتتى جاۋىن- شاشىننىڭ اسەرىنەن جانە قار جامىلعىسىنىڭ بيىك بولۋىنا بايلانىستى 31 - قاڭتار 1 - اقپان ارالىعىندا قار كوشكىنى كۇتىلىپ وتىرعانىن ەسكەرتەدى»، دەلىنگەن حابارلامادا.

 سونىمەن قاتار، ت ج د تاۋ شاتقالدارىنا شىقپاۋعا شاقىرادى.

اۆتور: الماس مۇقاش ۇلى