ميگرانتتار مەن بوسقىندار ادام ساۋداسىنىڭ وڭاي ولجاسىنا اينالۋدا
بۇل جايىندا باكۋدەگى قازاقپارات تىلشىسىنە ازەربجايجاننىڭ مەملەكەتتىك كوشى-قون قىزمەتى جانىنداعى قوعامدىق كەڭەستىڭ ءتوراعاسى، «حايات» گۋمانيتارلىق قولداۋ كورسەتۋ قوعامدىق بىرلەستىگىنىڭ جەتەكشىسى ازەر اللاحۆەرانوۆ ايتتى.
ونىڭ ايتۋىنشا، اۋعانستان بوسقىندارى يرانعا باعىت الادى. ال ءبىر بولىگى ازەربايجان ارقىلى ەۋروپاعا جەتۋگە تىرىسادى. سوعىستان قاجىعان سيريالىقتار تۇركياعا اعىلۋدا. افريكا ەلدەرىنىڭ بوسقىندارى باتىس ەۋروپاعا جەتۋدى كوزدەيدى. ميگرانتتاردى دىتتەگەن جەرلەرىنە جەتكىزۋمەن كاسىبي كونترابانداشىلار اينالىسسا، وزگە قىلمىستىق توپتار بوسقىنداردى ادام ساۋداسى ءۇشىن پايدالانادى.
ميگرانتتارعا جاقسى ءومىر، جوعارى جالاقى ۋادە ەتىپ، ودان كەيىن قۇجاتتارىن تارتىپ الادى دا، ەركەكتەرىن جۇمىسقا، جاس ايەلدەرىن جىنىستىق قۇلدىققا سالادى. بالالار مەن جاسوسپىرىمدەردى قايىر تىلەۋگە ماجبۇرلەيدى.
«كوشۋ نەمەسە تۇرمىستىق ماسەلەلەرى ءۇشىن اقشا ۇسىنۋ الەۋەتتى قۇرباندى تاۋەلدى ادامعا اينالدىرادى. زاڭسىز كەلگەن ميگرانت ادام ساۋداسىمەن اينالىساتىن توپتاردىڭ نەگىزگى نىسانى سانالادى. ءتىپتى، ول ەلگە زاڭدى جولمەن كەلسە دە كەزدەيسوق جايتتارمەن قىلمىستىق توپتار قارماعىنا ءتۇسىپ قالۋى مۇمكىن»، - دەدى ول.
اللاحۆەرانوۆتىڭ ايتۋىنشا، ورتالىق ازيا مەن وڭتۇستىك كاۆكاز وڭىرىنەن دە ادام ساۋداسىنىڭ قۇربانىنا اينالعاندار جەتەدى. «ۇلتتىق ۇكىمەتتەر تارابىنان ادام ساۋداسىمەن كۇرەس سالاسىندا جۇزەگە اسىرىلىپ جاتقان مەملەكەتتىك ساياساتتى ات ءۇستى قاراپ، زەردەلەپ كورگەننىڭ وزىندە مۇنداي بەتالىس دامىپ كەلە جاتىر دەپ ايتۋعا بولادى»، - دەدى ساراپشى. ونىڭ سوزىنە قاراعاندا، حالىقارالىق قىلمىستىق توپتار الەمنىڭ ءتۇرلى وڭىرىندەگى تۇراقسىزدىقتاردى وزدەرىنىڭ ءىس- ارەكەتتەرىنە ءتيىمدى پايدالانادى.
«ساقتالىپ وتىرعان ەكونوميكالىق داعدارىس، قارۋلى قاقتىعىستار جانە باسقا دا سەبەپتەر ادام ساۋداسى پروبلەماسىنىڭ دامۋىنا جانە ونىڭ وزگە دە پىشىمدەرىنىڭ كورىنىس تابۋىنا جول اشادى»، - دەدى اللاحۆەرانوۆ.
اۆتور: مارلان جيەمباي
