ءبىز «الماس قىلىشتىڭ» جالعاسى بولاتىن كەيبىر ەپيزودتاردى ءتۇسىرىپ قويدىق - رۇستەم ءابدىراش

استانا. قازاقپارات - رەجيسسەر ءاربىر ءبولىمدى «كوشپەندىلەر» ەمەس، «قازاق حاندىعى» دەگەن سوزبەن باستاۋدىڭ نەگىزگى سەبەبىن دە اشىپ بەردى، دەپ حابارلايدى قازاقپارات ءتىلشىسى.

 «ارينە، حالىق قولداپ جاتسا، ەكىنشى ءبولىمدى دە تۇسىرۋگە بولادى. ونى مينيسترلىك تە، ۇكىمەت تە قولدايدى دەپ ويلايمىن. ەندى، ەڭ قيىنى باسى عوي. باسىن باستادىق، جالعاسىن دا تۇسىرۋگەبولادى. فيلمنىڭ شىعارماشىلىق ۇجىمى دايىن. كەلەسى ماۋسىمنىڭ ءۇش- ءتورت ەپيزودتارىن ءتۇسىرىپ تە تاستاعانبىز. ونى «الماس قىلىشتى» جاساعاندا ءبىرجولا جاساپ قويدىق. ەندى، قارجى ماسەلەسى شەشىلسە، جۇمىسقا كىرىسۋگە بولادى»، - دەدى ءابدىراش قازاقپارات تىلشىسىنە بەرگەن سۇحباتىندا.

رەجيسسەردىڭ ايتۋىنشا، جازۋشى ءىلياس ەسەنبەرليننىڭ «كوشپەندىلەر» تريلوگياسى نەگىزىندە تۇسىرىلگەن العاشقى ءبولىمنىڭ اتاۋىن «قازاق حاندىعى» سوزىنەن باستاۋدىڭ وزىندىك ءمانى بار. ودان كەيىنگى كينونۇسقالار دا وسى سوزبەن باستالاتىن بولادى. «ويتكەنى «قازاق حاندىعى» دەگەن تۇسىنىكتى حالىقتىڭ ساناسىنا سىڭىرە بەرۋ كەرەك. سەبەبى قازىرگى قازاقستان مەملەكەتتىلىگىنىڭ ءتۇپ تامىرى سول قازاق حاندىعىندا جاتىر. سوۆەت وكىمەت كەزىندە ونىڭ ماعىناسىن تومەندەتىپ، حالىقتىڭ ساناسىنان مۇلدەم ءوشىرىپ تاستاۋعا تىرىسقان. قازاق حاندىعى دەگەن كەزدە ءبىر ۇرەيمەن ايتامىز دا. ونى اۋىز تولتىرىپ، قورىقپاي ايتۋ قاجەت»، - دەپ اتاپ كورسەتتى رەجيسسەر.

ايتا كەتەيىك، ءىلياس ەسەنبەرليننىڭ «كوشپەندىلەر» تريلوگياسى ءۇش بولىمنەن تۇرادى. «الماس قىلىش» رومانىندا 15-16 - عاسىرلاردا قازاق حاندىعىنىڭ قۇرىلۋى، ءابىلقايىر، جانىبەك، كەرەي حانداردىڭ تاق ءۇشىن تالاسى، قازاق رۋلارىنىڭ بىرىگۋ يدەياسى سۋرەتتەلسە، «جانتالاس» رومانىندا 17-18 - عاسىرلارداعى قازاقستاننىڭ شەتەل باسقىنشىلارىمەن كۇرەسى جانە ءابىلقايىر حاننىڭ قازاقستاننىڭ باتىس بولىگى مەن رەسەي پاتشالىعى قول استىنا كىرۋى سيپاتتالادى. قالماق حاندىعىنىڭ قازاق ەلىنە جاساعان شاپقىنشىلىعى، الاكول ماڭايىندا، ورداباسى وڭىرىندە بولعان قىرعىن ۇرىستار، رەسەي پاتشالىعىنىڭ قول استىنا كىرگەن ءابىلقايىردىڭ تۇپكى ارماندارىنىڭ جەكە باسىنداعى تۇڭىلىستەرى تۋرالى جازىلعان.

 ال «قاھار» اتتى ءۇشىنشى روماندا 18 - عاسىردا ابىلاي حان باستاعان قازاق حالقىنىڭ قالماق باسقىنشىلارىن ءبىرجولاتا تالقان ەتۋى، ابىلايدىڭ قازاق ەلىن دەربەس قازاق حاندىعىنا بىرىكتىرۋ ارەكەتتەرى جانە ابىلايحان مەن ونىڭ باتىرلارىنىڭ ەل تاۋەلسىزدىگى ءۇشىن كۇرەستەگى ەرلىك، دانالىق ىستەرى باياندالادى. ابىلاي حاننىڭ قازاق ەلىن بىرىكتىرۋ جولىنداعى جانتالاسى باياندالادى.

 اۆتور: ارمان اسقاروۆ